Pesë vjet më parë, më shumë se një milion njerëz kanë kaluar në Evropë. Shumë nga ta kanë marrë rrezikun e madh dhe janë nisur drejt udhëtimeve të rrezikshme në përpjekje për t’i ikur konfliktit dhe për të gjetur një jetë më të mirë.
Por fluksi i papritur i njerëzve ndezi një krizë – njerëzore dhe politike – përderisa Evropa e pati të vështirë t’i përgjigjet, shkruan KOHA. Mijëra sosh vdiqën duke u munduar të prekin bregun e detit dhe, përderisa disa vende iu hapën krahët, të tjerat ngritën gardhe dhe mbyllën kufijtë e tyre.
Ndikimi i këtij migrimi masiv ndihet ende edhe sot. Këtu, korrespondentët e BBC-së, ekspertët dhe ata të cilët udhëtuan krye në vete pasqyrojnë atë kohë dramatike. Si i ndryshoi kjo gjë Evropën dhe jetët e njerëzve të përfshirë?
Si filloi: “E dija që s’kemi të ardhme”
Lara Tahan, mësuese siriane: Jeta ime para luftës së vitit 2011 ishte shumë e mirë. Isha mësuese e matematikës në Halep me dy fëmijë. Por kur filloi lufta, e dija se nuk kam të ardhme në këtë vend. Dikur ngisja makinën për të shkuar në punë dhe shihja trupat e vdekur përreth rrugës. Kështu që shkova në Turqi – ishte mundësia më e lehtë atëbotë.
Mark Lowen, korrespondent në Turqi gjatë viteve 2014-19: Lufta e Sirisë e goditi Turqinë në front të historisë së migracionit. Ajo kufizohet me Greqinë dhe Bullgarinë, kështu që në shumë mënyra u shndërrua në dhomën e pritjes evropiane. Ishte një vlug i madh i njerëzve nga Siria për në Turqi dhe pastaj për në Greqi në vitin 2015.
