Lumi Vjosa është futur zyrtarisht në UNESCO si pjesë e programit “Njeriu dhe Biosfera”, duke u renditur në listën e trashëgimisë botërore natyrore. Vendimi u mor nga Këshilli Koordinues Ndërkombëtar i Programit në Kongresin Botëror mbi Rezervat e Biosferës, i zhvilluar në Kinë.
Ky vlerësim i jep Shqipërisë një tjetër arritje të rëndësishme ndërkombëtare në fushën e mbrojtjes së mjedisit, duke kurorëzuar përpjekjet disavjeçare për ruajtjen e lumit të fundit të egër në Evropë.
Lajmin e ka ndarë edhe kryeministri Edi Rama si dhe ish-ministrja e Turizmit dhe Mjedisit, aktualisht Ministre e Arsimit, Mirela Kumbaro, duke e cilësuar këtë si një arritje historike.
“Është kurorëzimi i një pune katërvjeçare. Jam shumë e lumtur që flamurin shqiptar në këtë kongres e ngritën disa prej kryetarëve të bashkive buzë Vjosës dhe drejtuesja e Zyrës së Administrimit të Parkut Kombëtar të Vjosës, në emër të shumë njerëzve punëtorë që jetojnë pranë lumit dhe kujdesen për të çdo ditë. Mirënjohje me gjithë zemër skuadrës së Ministrisë së Mjedisit, Agjencisë Kombëtare të Zonave të Mbrojtura, ekspertëve të UNESCO-s dhe drejtoreshës së përgjithshme të UNESCO-s, Audrey Azoulay, e cila vizitoi luginën e Vjosës në vitin 2023”, u shpreh Kumbaro.
Përfshirja e Vjosës në këtë program e pozicionon lumin si një pasuri me vlera universale, duke i dhënë identitetin si vend i pasur me biodiversitet dhe natyrë të paprekur.
Çfarë është programi “Njeriu dhe Biosfera”
Programi “Njeriu dhe Biosfera” është një iniciativë shkencore ndërqeveritare e UNESCO-s, që synon të përmirësojë marrëdhënien midis njeriut dhe mjedisit. Ai kombinon shkencat natyrore dhe shoqërore për të promovuar zhvillim ekonomik të qëndrueshëm, duke ruajtur ekosistemet natyrore dhe duke respektuar vlerat kulturore e sociale të komuniteteve.
Rrjeti Botëror i Rezervave të Biosferës është një rrjet dinamik që përfshin zona të veçanta në mbarë botën. Qëllimi i tij është ruajtja e biodiversitetit, nxitja e kërkimit dhe monitorimit, si dhe ofrimi i modeleve të zhvillimit të qëndrueshëm në harmoni me natyrën.
