Presidentja e Komisionit Evropian, Ursula von der Leyen, paralajmëroi ligjvënësit të mos bien pre e përpjekjeve të Presidentit rus Vladimir Putin për të përçarë Evropën dhe i nxiti ata të punojnë së bashku për 450 milionë qytetarët e BE-së.
Deklarata e saj erdhi përpara dy votave të mocioneve të mosbesimit që pritet të zhvillohen këtë javë në Parlamentin Europian.
Presidentja e Komisionit Evropian, Ursula von der Leyen, ka thënë se udhëheqësi i Kremlinit, Vladimir Putin, e përçmon Bashkimin Evropian, synon të minojë unitetin e tij dhe ka aleatë brenda BE-së që e ndihmojnë të krijojë ” çarje në ndërtesën e Evropës” .
Vetëm tre muaj pasi i mbijetoi një votimi në Parlament mbi udhëheqjen e saj të Komisionit Evropian, von der Leyen përballet me dy mocione të tjera besimi, të cilat u debatuan të hënën në mbrëmje.
Dy grupime politike – e majta ekstreme dhe e djathta nacionaliste – kanë paraqitur mocione kundër von der Leyen, duke e akuzuar për politika të dëmshme tregtare, neglizhencë ndaj shkeljeve të ligjit ndërkombëtar në Gaza, si dhe për dështime në menaxhimin e migracionit dhe sigurisë ushqimore.
Megjithatë, partitë pro-evropiane të qendrës, që përbëjnë shumicën në parlament, pritet t’i refuzojnë mocionet, të cilat kërkojnë një shumicë prej dy të tretash për t’u miratuar.
Von der Leyen, gjatë fjalimit në Strasburg, tha se Putini po përpiqet të mbjellë përçarje në Evropë përmes dezinformimit dhe manipulimit politik.
Ajo theksoi se “kundërshtarët tanë po nxisin aktivisht përçarje” dhe se “Putini ka miq të bindur në Evropë që po bëjnë punën e tij”.
Presidentja e Komisionit Evropian akuzon kështu Patriotët e Le Pen dhe Orbán, si edhe të majtët, se po veprojnë në shërbim të Kremlinit për të dobësuar BE-në dhe për të justifikuar luftën kundër Kievit.
Sipas saj, “ky është mashtrimi më i vjetër në botë, të mbjellësh përçarje për t’i vënë evropianët kundër njëri-tjetrit. Është një kurth.”
Udhëheqësja e ekzekutivit evropian është e bindur se edhe shkeljet e hapësirës ajrore në Estoni, Poloni dhe Danimarkë bëjnë pjesë në të njëjtën strategji: “Evropa ndodhet në gjendje gatishmërie të lartë.” Prandaj, thirrja e saj është për unitet kundër armikut rus.
Kjo është hera e dytë që von der Leyen përballet me mocion mosbesimi, pas një votimi të ngjashëm në korrik që ajo e fitoi me lehtësi. Votat e kësaj jave konsiderohen si përpjekje politike nga grupet ekstremiste për të fituar pikë, ndërsa kritikat ndaj saj dhe Partisë Popullore Evropiane – grupimi më i madh politik në parlament – vazhdojnë të rriten.
