Në muajin dhjetor, kryeministri Edi Rama shpalli nismën për mbylljen e TikTok-ut, duke e cilësuar këtë platformë si “rrugaçi i lagjes” që duhet ndaluar për të mos i lejuar rrugaçët të publikojnë materiale problematike. Kjo lëvizje u pa nga shumëkush si një përpjekje për të spostuar vëmendjen nga problemet reale të vendit. Megjithatë, duket se lufta e Ramës me “rrugaçët” nuk ndalet vetëm tek TikTok-u. Këtë herë, ai shkon më tej duke iu mohuar atyre edhe të drejtën themelore të votës.
Sipas rregullave të reja për votimin nga jashtë, një i ri shqiptar që jeton në një vend të Europës, por që nuk ka një adresë fikse, nuk ka të drejtë të votojë. Dhe kështu, mijëra të rinj shqiptarë, të cilët janë larguar nga vendi në kërkim të një jete më të mirë, por që nuk kanë ende një vendbanim të stabilizuar, gjenden të përjashtuar nga e drejta e tyre themelore e votes si qytetarë. Shumë prej tyre janë detyruar të largohen pikërisht prej keqqeverisjes së kryeministrit Rama. Pa mundësi në vendin e tyre për të ndërtuar një të ardhme të sigurt, ata bredhin rrugëve të Europës në kërkim të një jete më të mirë.
A mos vallë ky ishte “rrugaçi” që Rama kishte në mendje kur vendosi këto rregulla? Të heqësh të drejtën e votës dikujt vetëm pse ai nuk ka një adresë fikse është një akt diskriminues dhe përjashtues. Çdo shqiptar, pavarësisht ku ndodhet apo sa e stabilizuar është jeta e tij jashtë vendit, ka të drejtë të votojë dhe të kontribuojë për të ardhmen e tij dhe të vendit të tij.
Kështu, lufta kundër “rrugaçëve” merr një kah tjetër: nga kontrolli mbi platformat digjitale tek kufizimi i të drejtës demokratike. Dhe pyetja që mbetet është: kush do të jetë “rrugaçi” i radhës në sytë e qeverisë?
