Ish-kryeministri Sali Berisha ka publikuar disa pamje nga votimi elektronik në Elbasan, me anë të të cilave denoncon parregullsitë dhe shkeljet e bëra gjatë procesit të votimit më 14 maj. Sipas Berishës, këqyrja e pamjeve filmike në gati 70 qendra votimit, tregon se zgjedhjet janë vjedhjet.
“Tre qytetarë votojnë 2 herë brenda pak minutash në Komunën Papër.
Në komunën Labinot Mal, votim masiv familjar.
Dy raste ku operatori PEVN dikton votën e qytetarëve
Operatorja PEVN dikton votën gjatë gjithë procesit të votimit ngjitur me pajisjen e votimit dhe dikton votimin tek të gjithë qytetarët. Shumicën e rasteve fotografon pajisjen dhe vendin ku printohet fleta e votimit. Fotografon votën që të tregojë se e ka bërë mirë detyrën. Kriminelë elektorale.
Në Elbasan operatori Jani Zena dikton votën qytetarët. Kriminel elektroral.
Këto ishin disa nga video përfaqësuese të mbi 70% të QV të kontrolluara sepse jo të gjitha janë kontrolluar dhe sepse në jo pak raste kamerat janë vendosur në atë mënyrë që përjashtojnë kontrollin”, tha Berisha.
Ky i fundit theksoi se Elbasani është farsa më e shëmtuar elektorale, pavarësisht votimit dixhital.
Sipas tij, Kryeministrin Edi Rama dhe kriminelët e tij elektoral sikurse i cilësoi ai, nuk i ndal as ligji për të rrëmbyer mandatet që nuk i takonin.
Zgjedhjet vendore, theksoi Berisha nuk do të njihen kurrë, ndërsa sheh protestat si të vetmen rrugëdalje për votim të lirë për qytetarët.
“Kjo ka qenë shumë e përhapur në Kamzë dhe në zonat e tjera. Siç e shihni, Elbasani, është farsa më e shëmtuar elektorale pavarësisht nga votimi dixhital që u vendos aty me qëllimin e mirë për të shënuar një hap cilësor. Për Edi Ramën dhe kriminelët e tij elektorale, nuk i ndal asgjë, as shkelje ligji, as dhunim kodi për të rrëmbyer mandatet që nuk u takojnë. Këto zgjedhje nuk njihen dhe nuk do njihen kurrë. Shqiptarët në protestë do të vendosin të drejtën e tyre legjitime për të votuar si të gjitha kombet e botës”, tha ai.
