Deputetja e Partisë Demokratike, Jozefina Topalli, kërkoi reagimin e shtetit pas vrasjes së gjyqtarit Astrit Kalaja në sallën e Gjykatës së Apelit teksa po jepte një vendim.
“Që mbajtja e një minutë heshtje të mos duket hipokrizi, duhet të reagojmë”, tha Topalli në fjalën e saj në Kuvend.
“As në Ekuador nuk ka ndodhur që të vritet gjykatësi në sallën e gjyqit. As mafia italiane nuk e ka bërë një gjë të tillë. Kjo gjë ka ndodhur në vendin tonë. Kjo vrasje hoqi edhe një herë iluzionin se në këtë vend ka shtet. Nëse nuk reflektojmë, ky vend do të shkojë në humnerë”, shtoi Topalli.
Gjyqtari Astrit Kalaja u ekzekutua me armë zjarri të hënën, më 6 tetor, teksa po jepte një vendim për çështje pronësie. Autori Elvis Shkambi u arrestua nga policia.
Një javë më pas, në sallën e gjyqit, Shkambi i kërkoi falje publike familjes së gjykatësit dhe tha se e kreu vrasjen për shkak të dështimit të institucioneve për të dhënë drejtësi për çështjen e tij.
