Nëna e Mark Samsonit, 23-vjeçarit që vrau ish-të dashurën e tij, Ilaria Sula, më 26 mars, është dënuar me dy vjet burg për fshehjen e kufomës. Dy ditë më parë, gjyqtari miratoi marrëveshjen e pranimit të fajësisë, duke i dhënë Manlapaz dënim me kusht. Ndërkohë, seanca paraprake për gjyqin e Mark Samsonit është caktuar të nisë më 9 dhjetor. Familja e viktimës reagoi ashpër ndaj vendimit, ku babai i Ilarias, Flamur Sula, e quajti marrëveshjen të padrejtë.
“Për ne, kjo nuk është drejtësi. Ne u shkatërruam pasi pamë një gjyq që zgjati pesë minuta. Një person që pastroi litra gjak të vajzës sime që ishte hedhur në tualet… për ne, kjo nuk është drejtësi,” tha për ANSA-n Flamur Sula, babai i Ilarisë.
Roli i nënës në fshehjen e trupit të Ilarias
Sipas hetimit, vrasja ndodhi në apartamentin në Via Homs, në lagjen Africano të Romës. Mark Samson dyshohet se e sulmoi Ilaria Sulën, duke e goditur me thikë në qafë të paktën tre herë, duke i shkaktuar shok hemorragjik fatal. Pasi e vrau, ai e mbështolli trupin e saj në një qese dhe më pas e vendosi në një valixhe, të cilën e çoi me makinë në një zonë të pyllëzuar në Poli, ku valixhja u braktis.
Që në fillim, hetuesit dyshuan se djali nuk kishte vepruar vetëm. Të dhënat e telefonit celular të nënës së tij e vendosnin atë në shtëpi gjatë orëve kritike dhe logjika sugjeronte se ata mund të kishin ndihmuar pas krimit. Më pas gjatë marrjes në pyetje, Nosr Manlapaz, nëna e djalit, pranoi përfshirjen e saj.
“E ndihmova të pastronte shtëpinë, të hiqte gjithë atë gjak,” deklaroi e ëma e autorit.
Gruaja e përshkroi djalin e saj si të frikësuar dhe momenti kur pa Ilarinë të shtrirë përtokë, një imazh që e shtyu të ndërhynte për të pastruar gjurmët dhe për të ndihmuar djalin e saj të fshihte trupin. Sipas hetuesve, roli i nënës ishte vendimtar në mbulimin e ngjarjes, ajo ndihmoi në pastrimin e apartamentit dhe në eliminimin e provave kompromentuese.
Marrëveshja për pranimin e fajësisë e ka zgjidhur pozicionin e saj, por për familjen e Ilarias, mbetet një çështje e pazgjidhur, ndërsa hetimi kryesor tani kalon në gjyqin që do të përcaktojë përgjegjësinë e plotë të Mark Samsonit.
Si u vra Ilaria Sula
Ilaria Sula, rezultonte e zhdukur që prej datës 25 Mars në Romë. Fillimisht kishte dyshimet se ajo ishte larguar pas ndarjes me të dashurin, 23-vjeçarin filipinas, por më pas ngjarjet morën një kthesë dramatike. Trupi i studentes shqiptare u gjet brenda një valixheje të madhe në fund të një shkëmbi në një zonë pyjore në Poli.
Hetimet janë fokusuar tek fundi i lidhjes së saj me të dashurin Filipinas.
Sipas raportimeve ka qenë i riu që dërgoi efektivët në zonën ku u gjet trupi i Ilaria Sulës, e cila studionte në Universitetin Sapienza në Romë. Ilaria ishte larguar nga shtëpia me qira që ndan me tre shoqe të tjera, por nuk ishte kthyer më. Mbrëmjen e 25 Marsit shkëmbeu mesazhe në ëhatsapp me shoqet e shtëpisë, të cilat të shqetësuara se ajo nuk ishte kthyer, i kishin shkruar.
Më pas çdo kontakt ishte shkëputur. Ka dyshime se 23-vjeçari Filipinas ka përdorur telefonin e viktimës pas vrasjes së saj për të shkëmbyer mesazhe si edhe për të bërë postime në rrjetet e saj sociale. Sipas medias italiane, ai e ka vrarë Ilaria Sulën duke e goditur me thikë në një apartament në Romë dhe më pas ka hequr qafe trupin pasi e ka futur në një valixhe. Ka qenë edhe analiza e tabulateve të telefonit dhe qelive që inkriminuan të dashurin e viktimës.
