Vrasja e shtetases Mimoza Paja, si dhe dëmtimi e plagosjen e disa shtetasve të tjerë në ambientet e një lokali në pronësi të vëllezërve Murati në Tiranë, në muajin mars, ka çuar në caktimin e masës “arrest me burg” për shtetasin, Nikoll Sherrniku.
Nga tërësia e veprimeve hetimore të kryera në funksion të këtij procedimit penal, është arritur në përfundimin se Nikoll Sherrniku, me veprime aktive ka siguruar kushtet dhe mjetet materiale që kanë shërbyer për kryerjen e veprës penale ku mbeti e vrarë një qytetare, ndërsa disa të tjerë u plagosën.
“Vijojnë veprimet e thelluara hetimore për zbardhjen dhe dokumentimin ligjor të ngjarjes së ndodhur me datë 12.03.2023, ku mbeti e vrarë një shtetase. Në vijim të punës për zbardhjen dhe dokumentimin ligjor të ngjarjes së ndodhur në rrugën”Anastas Shundi”, e cila bën fjalë për vrasjen e shtetases Mimoza Paja dhe dëmtimin/plagosjen e disa shtetasve të tjerë në ambientet e një lokali në pronësi të vëllezërve Murati, informojmë se më datë 07.06.2023 u bë ekzekutimi i vendimit të Gjykatës së Rrethit Gjyqësor Tiranë e cila ka vendosur caktimin e masës të sigurimit personal atë të “Arrest në burg“ ndaj personit nën hetim N. Sh., 28 vjeç, lindur dhe banues në Fushë – Kuqe, Laç, (aktualisht nën hetim me masën e sigurisë “Arrest në burg” edhe për vepra të tjera penale), si i dyshuar për kryerjen e veprës penale “Sigurimi i kushteve dhe mjeteve materiale për të kryer vrasje”.”– thuhet në njoftimin e policisë.
Hetimet e policisë
Policia bën të ditur se përgjatë hetimeve është arritur në përfundimin se veprimet e kryera nga Sherrniku konsistojnë në marrjen e targave të huaja ne shtetin gjerman, sjelljen e tyre në Shqipëri, dhe vënien në dispozinon të këtyre targave personave të tretë (autorëve), të cilët më pas i kanë ruajtur dhe përdorur këto targa në një automjet tip “BMË” seria 5, ditën e ngjarjes.
Sipas policisë, automjeti tip “BMË”, sëbashku me targat gjermane, është gjetur i djegur në fshatin Likmetaj, Manëz, Durrës.
“Në funksion të këtij procedimi janë kryer veprime të shumta hetimore dhe ekzekutuar letër-porositë në Gjermani dhe në Kosovë. Vijon puna nën drejtimin e Prokurorisë së Rrethit Gjyqësor Tiranë, për dokumentimin e plotë ligjor, me prova të autorëve të kësaj ngjarje kriminale.”– thuhet në njoftimin e policisë.
