Vrasja e Pjerin Xhuvanit, dënohet me 22 vite burg Arbër Paplekaj.
Vendimi është dhënë mesditën e kësaj të mërkure nga Gjykata e Elbasanit, ndërkohë që me 18 muaj shërbim prove janë dënuar dhe efektivët e Forcave Shqiponja, që ishin vënë nën hetim pas ngjarjes që tronditi Elbasanin para zgjedhjeve të Prillit 2021.
Për dy nëndrejtorët e Policisë së Elbasanit Gjykata vendosi dënimin me 1 vit shërbim prove.
Ndërkohë, avokati i Arbër Paplekajt tha se vendimin do ta ankimojë në Gjykatën e Apelit. “Në dy vite që është zhvilluar ky gjykim, kam jetuar edhe me dhimbjen që i është shkaktuar të ndjerit Pjerin Xhuvani dhe shfrytëzoj rastin. Që në fillim, si nga policia dhe nga prokuroria, ka pasur një përpjekje për të fshehur episodet e kësaj ngjarjeje dhe në mënyrë të veçantë edhe akteve të mëvonshme që e kanë deformuar këtë ngjarje.
Unë dhe Arbër Paplekaj kemi qenë që në fillim për të shkuar tek e vërteta. Gjykata ka rrëzuar disa kërkesat tonat që lidheshin me sqarimin e së vërtetës të ngjarjes. Rrëzimi i kësaj kërkese ka qenë refuzim për të mësuar të vërtetën dhe për të shkuar tek e vërteta. Arbër Paplekaj ka qëlluar me armë, por mënyra dhe rrethanat pse ka qëlluar nuk janë marrë përsipër. Vendimin do ta ankimojmë në Gjykatën e Apelit”, tha avokati i Arbër Paplekajt pas vendimit të Gjykatës së Rrethit Gjyqësor Elbasan.
Ngjarja e rëndë ndodhi në 21 prill të vitit 2021 në qytetin e Elbasanit. Struktura për mbrojtjen e votës e ngritur nga PD pretendonte se përfaqësues të Partisë Socialiste po blinin vota. Dy grupet u përplasën me njëra-tjetrën dhe Arbër Paplekaj qëlloi me kallashnikov duke lënë të vdekur Pjerin Xhuvanin dhe u plagosën 4 persona. Vetë Paplekaj pas ngjarjes deklaroi se qëlloi për vetëmbrojtje.
