Një grua shtatzënë është vrarë më 30 nëntor në oborrin e Qendrës Klinike Universitare të Kosovës (QKUK).
35-vjeçarja dyshohet se është vrarë nga ish-bashkëshorti i saj para hyrjes së Klinikës së Gjinekologjisë.
Lidhur me këtë rast ka reaguar edhe avokati Besnik Berisha.
Në llogarinë e tij në Facebook, Berisha ka thënë se kjo ditë do të shënoi dënimin e parë në Kosovë me burgim të përjetshëm.
Sipas Berishës, ky dënim mund të mos ekzekutohet vetëm nëse dorasi i jep aktgjykimin vetes akoma pa u dënuar nga gjykata.
“Kjo që ndodhi sonte në oborrin e SHSKUK , ku në rrethana akoma të panjohura ish bashkëshorti privoi nga jeta gruan shtatzënë dhe u zhduk akoma pa gjurme, do shënoi dënimin e parë në Kosovë me burgim të përjetshëm (të konfirmuar në secilën instancë)”.
“Ky dënim mund të mos ekzekutohet vetëm nëse dorasi i jep aktgjykimin vetes akoma pa u dënu nga gjykata. Kështu mendoj unë”, shkroi Berisha.
Ndryshe, rastet e dhunës në familje në Kosovë janë rritur në vitet e fundit.
Sipas të dhënave të Policisë së Kosovës, gjatë vitit 2020 në Kosovë janë evidentuar 2.069 raste të dhunës në familje, me 2.101 viktima; në vitin 2021 janë evidentuar 2.456 raste me 2.486 viktima.
Kurse, gjatë periudhës janar-shtator 2022, janë regjistruar 2.067 raste të dhunës në familje me 2.126 viktima./
