Millosh Plleskoviç është dënuar më 15 vjet burgim nga Gjykata Themelore në Prishtinë, pasi u shpall fajtor për krime lufte kundër popullsisë civile gjatë luftës së fundit në Kosovë.
Plleskoviç ishte pjesë e një grupi të armatosur serbësh që në vitin 1999 kishin marrë pjesë në vrasjen dhe plagosjen e civilëve shqiptarë në Prizren.
Sipas akt-akuzës, i pandehuri kishte hapur zjarr më armë automatike të llojit ‘Kallashnikov’, duke shkaktuar vdekjen e tre civilëve shqiptarë Reshat Daci, Binak Daci dhe Fatmir Bojaxhiu si dhe plagosjen e Xhenger Canës, Fevzi Canës dhë Bashkim Kastratit.
Në dosjen e Prokurorisë thuhet së trupat e viktimave u janë kthyer familjarëve vetëm pas një jave nga vrasja. Dy prej tyre ishin vendosur mbi njëri-tjetrin, njëri më këmbë të prerë, ndërsa një tjetër ishte gjetur pa kokë.
Plleskoviç gjendet aktualisht në paraburgim, ndërsa ekzekutimi i dënimit do të bëhet pas hyrjes në fuqi të aktgjykimit, brenda një afati 15-ditor.
