Habib Rexha është shprehur për hetuesit se e vrau Arian Gosën nga gjaknxehtësia. Klan News raporton se Rexha ka thënë se armën me të cilën kreu krimin e mbante me vete. Ai e ka parë viktimën e tij rastësisht në kafe dhe më pas ka vepruar nga gjaknxehtësia. Pas kësaj është larguar bashkë me një shok nga Durrësi në drejtim të Kukësit.
“Isha pranë një kinkalerie bashkë me një shokun tim. Pashë që shënjestra ka qenë ulur në lokal. Pashë atë dhe ika 300 metra larg. Lashë makinën atje dhe u ktheva në këmbë. Armën e mbaja me vete. Shoku nuk ka qenë në dijeni. E pashë rastësisht në kafe. Veprova nga gjaknxehtësia. U largova bashkë me shokun nga Durrësi në drejtim të Kukësit”, u shpreh ai para hetuesve.
Pas kësaj deklarate, Klan News raportoi se policia ka shoqëruar edhe një tjetër person për vrasjen. Bëhet fjalë për Ervis Kurtin, shokun e Habib Rexhës. Sipas të njëjtave burime, Kurti është ndaluar pas dyshimeve se ka ndihmuar 31-vjeçarin të largohej pas krimit.
Kujtojmë që Rexha u vetëdorëzua ditën e sotme me vullnet të lirë dhe pas kërkesës së familjes. Ai qëndroi 2 ditë në arrati pasi vrau Arian Gosën në një lokal të Kavajës pasditen e së dielës.
Tvklan.al siguroi një video ekskluzive të Habib Rexhës para se të vetëdorëzohej në Komisariatin e Kavajës. 31-vjeçari shfaqet me babain e tij dhe thotë se do të dorëzohet me vullnetin e tij të lirë dhe me kërkesë të familjarëve.
“Unë jam Habib Rexha, ky është Fadil Rexha, babai im. Me dëshirën time do vetëdorëzohem në Komisariatin e Kavajës dhe me kërkesën e familjes time”, u shpreh ai.
Habib Rexha u filmua nga kamerat e sigurisë së bizneseve në Kavajë teksa largohej me vrap pasi qëlloi me plumb në kokë Arian Gosën. Viktima ishte duke konsumuar një kafe me babain e tij, i cili dëshmoi me sytë e tij ekzekutimin e të birit. U deshën 3 orë që policia të identifikonte Habib Rexhën dhe e shpalli zyrtarisht në kërkim më pas.
Kjo ngjarje e rëndë vjen më pak se dy muaj nga vrasja e Edmond Gosës, vëllait të Arian Gosës, i cili në fund të Marsit, pas një sherri për motive banale, në një tjetër lagje të Kavajës, u konfrontua fizikisht me Altin Rexhën, vëllain e Habibit. Nga ngjarja ata mbetën të dy të vdekur.
