Më shumë se 30 persona, përfshirë gra e fëmijë, janë vrarë dhe trupat e tyre janë djegur në rajonin Kayah të Mianmarit, sipas raportimeve të medieve, një banori e një grupi vendës për të drejtat e njeriut.
Grupi për të drejtat e njeriut, Karenni, tha se i gjeti trupat e djegur të personave të zhvendosur brenda shtetit, përfshirë të moshuar, gra e fëmijë, të vrarë nga ushtria në pushtet, afër fshatit Mo Sot ë qytezës Hpruso të shtunën.
“Ne e dënojmë fuqishëm vrasjen çnjerëzore e brutale, që i shkel të drejtat e njeriut”, thuhet në një postim të këtij grupi në Facebook.
Ushtria e Mianmarit tha se ka vrarë një numër të pasaktësuar të “terroristëve me armë” nga forcat e armatosura qeveritare në këtë fshat, raportuan mediet shtetërore. U tha se këta njerëz ishin në shtatë automjete dhe nuk iu ndalën ushtrisë.
Fotografitë e shpërndara nga grupi për të drejtat e njeriut dhe mediet lokale shfaqën mbetje të djegura të trupave në disa automjete.
Forca Kombëtare Mbrojtëse e Karenni-t, një nga grupet më të mëdha militante civile që po lufton kundër qeverisë ushtarake, tha se të vdekurit nuk ishin pjesëtarë të saj, por civilë që kërkonin strehim nga konflikti.
Një banor i fshatit, që kërkoi të mos i publikohej emri për arsye sigurie, tha se ishte i vetëdijshëm për zjarrin të premten në mbrëmje, por nuk mund të shkonte në vendin e ngjarjes, sepse kishte të shtëna.
“Shkova ta shoh në mëngjes. Pashë trupa të vdekur që ishin djegur dhe gjithashtu rroba të shpërndara të fëmijëve e të grave”, i tha ai agjencisë “Reuters” përmes telefonit.
Paralajmërim: Fotografitë e mëposhtme përmbajnë pamje eksplicite të kufomave të djegura rëndë. Nuk preferohen për persona të ndjeshëm dhe fëmijë.
