Ish-kryetari i Parlamentit të Ukrainës dhe një figurë kyçe në revolucionin proevropian të vendit, Andriy Parubiy, është qëlluar për vdekje në Lviv.
Zyra e Prokurorit të Përgjithshëm raportoi se një person i armatosur hapi zjarr disa herë ndaj 54-vjeçarit Parubiy, duke e vrarë atë në vend. Autori u largua nga vendngjarja, ndërsa policia ka nisur operacionin për kapjen e tij.
Parubiy ishte anëtar i Parlamentit dhe shërbeu si kryetar i tij nga prilli 2016 deri në gusht të vitit 2019. Ai ishte një nga liderët e protestave të viteve 2013–14, që kërkonin lidhje më të ngushta me Bashkimin Evropian. Gjithashtu, ai mbajti postin e sekretarit të Këshillit Kombëtar të Sigurisë dhe Mbrojtjes së Ukrainës nga shkurti deri në gusht 2014, një periudhë kur filluan luftimet në Ukrainën lindore dhe Rusia aneksoi gadishullin e Krimesë.
Zyrtarët nuk dhanë ndonjë indikacion të menjëhershëm nëse vrasja ka lidhje të drejtpërdrejtë me luftën e Rusisë në Ukrainë.
Pamje të paverifikuara deri më tani treguan momentin kur autori, i veshur si një postier, me helmetë në kokë, i afrohet politikanit nga pas dhe e qëllon. Mediat ukrainase raportuan se i dyshuari u largua nga vendngjarja me një biçikletë elektrike.
“Ministri i Brendshëm Ihor Klymenko dhe Prokurori i Përgjithshëm Ruslan Kravchenko sapo më raportuan për rrethanat e para të njohura të një vrasjeje të tmerrshme në Lviv. Andriy Parubiy është vrarë” shkroi presidenti Volodymyr Zelensky në platformën X.
Ai shprehu ngushëllimet për familjen dhe të dashurit e Parubiy-t, duke shtuar: “Të gjitha forcat dhe mjetet e nevojshme janë angazhuar në hetimin dhe kërkimin për vrasësin.”
Policia ukrainase raportoi se të shtënat në Lviv u njoftuan rreth mesditës. Kryebashkiaku i Lviv-it, Andriy Sadovyi, tha se gjetja e vrasësit dhe sqarimi i rrethanave të sulmit është me rëndësi të madhe.
“Kjo është një çështje e sigurisë në një vend në luftë, ku, siç shihet, nuk ka vende plotësisht të sigurta” shkroi ai në Telegram.
Vrasja ndodhi vetëm pak orë pas sulmit masiv rus me raketa dhe dronë në të gjithë Ukrainën. Sipas Forcave Ajrore të Ukrainës, Rusia lëshoi 537 dronë sulmues si dhe 45 raketa. Forcat ukrainase neutralizuan 510 dronë dhe 38 raketa.
Sulmi gjatë natës deri të shtunën vrau të paktën një civil dhe plagosi 28 persona, përfshirë fëmijë, në rajonin e Zaporizhzhias, sipas guvernatorit Ivan Fedorov, ku një ndërtesë banimi pesëkatëshe u godit.
Të enjten Kremlini deklaroi se Rusia mbetet e interesuar për vazhdimin e bisedimeve për paqe, pavarësisht sulmit ajror në Kiev të asaj dite, që ishte një nga më të mëdhenjtë dhe më vdekjeprurësit që nga pushtimi i plotë i Rusisë në 2022-n.
Të paktën 23 persona u vranë, përfshirë fëmijë, dhe përpjekjet për kërkim dhe shpëtim vazhduan për orë të tëra për të nxjerrë njerëzit nga rrënojat. Pak pas sulmit, administrata Trump miratoi shitjen e armëve prej 825 milionë dollarësh për Ukrainën, që përfshin raketa me rreze të gjatë veprimi dhe pajisje të ngjashme për të rritur aftësitë mbrojtëse të vendit, ndërsa përpjekjet e SHBA-së për të ndërmjetësuar paqen mes Ukrainës dhe Rusisë duket se kanë ngecur.
