Prokurorët serbë kundër korrupsionit dhe krimit të organizuar akuzuan presidentin e vendit për ushtrim të ndikimit të jashtëligjshëm, pasi udhëheqësi i djathtë i cilësoi si banda të korruptuarish dhe i fajësoi për vonesat me të cilat po përballet një projekt rishvillimi i selisë së bombarduar të ish-ushtrisë jugosllave në qendër të Beogradit, për shkak të një hetimi në lidhje me atë objekt.
“Përmes ofensivës dhe komenteve të pavërteta, Aleksandar Vuçiç po shënjestron sërish prokurorët,” u shprehën këta të fundit në një deklaratë, ku theksojnë se Vuçiç kishte abuzuar me pushtetin që i ishte dhënë nga Kushtetuta, duke u përpjekur të ushtronte një ndikim të jashtëligjshëm përmes komenteve për hetimet që vijojnë.
Ndërsa protestat antiqeveritare po vijojnë për më shumë se një vit në Serbi, Vuçiç ka shtuar kritikat ndaj gjyqtarëve dhe prokurorëve, përfshirë ata që po hetojnë shembjen e strehës së stacionit hekurudhor të Novi Sadit, që nxiti protestat.
Në muajin prill të këtij viti, qindra gjyqtarë dhe prokurorë shprehën shqetësim të madh për komentet e presidentit kundër tyre. Disa pretenduan se ato ishin të jashtëligjshme. Por kjo nuk e ndali presidentin serb.
Në intervistën më të fundit për një transmetues proqeveritar, ai akuzoi gjyqësorin se në mënyrë të padrejtë kishte liruar protestues të ndaluar gjatë demonstratave të drejtuara nga studentë.
“Është e pabesueshme që kemi një situatë ku çdo ditë ata lirojnë njerëz që hedhin gurë, shkopinj dhe rrahin njerëz të tjerë nëpër rrugë. Në prokurori ka një bandë të korruptuarish, siç ka edhe gjyqtarë të tillë,” u shpreh ai.
Por prokurorët argumentojnë se këto deklarata pengojnë drejtësinë dhe minojnë rregullin kushtetues dhe ligjor, si dhe sundimin e ligjit.
Në raportin më të fundit për rrugëtimin e vendit të Ballkanit drejt anëtarësimit në BE, Komisioni Europian rekomandoi, mes të tjerash, reduktimin e ndërhyrjes politike në gjyqësor dhe prokurori.
“Presioni ndaj gjyqësorit vijon të mbetet një shqetësim, dhe ekzistojnë shqetësime për autonominë e prokurorisë,” shkruhet në Progress Raportin që u publikua të martën.
