Sekretari i Jashtëm i Mbretërisë së Bashkuar, David Lammy, tha të mërkurën në Beograd se ka biseduar me presidentin e Serbisë, Aleksandar Vuçiq, në lidhje me procesin e normalizimit të marrëdhënieve ndërmjet Serbisë dhe Kosovës, si dhe veprimet antikushtetuese të Millorad Dodikut, presidentit të entitetit serb të Bosnje e Hercegovinës, Republika Sërpska.
Duke folur pas takimit me Vuçiqin në kryeqytetin serb, Lammy tha se një Ballkan Perëndimor i qëndrueshëm dhe i sigurt, është i rëndësishëm për Mbretërinë e Bashkuar dhe se Serbia luan rol themelor në garantimin e këtij stabiliteti.
Vuçiq tha se kur është fjala për çështjen e Kosovës, ai dhe Lammy janë pajtuar se dialogu është i një rëndësie kyçe.
Lammy po qëndron në Beograd pas vizitës në Prishtinë në dy ditët e fundit, ku u takua me liderët e Kosovës.
Gjatë qëndrimit në Prishtinë, kryediplomati britanik theksoi se vendi i tij dëshiron “normalizim të qëndrueshëm e paqësor” ndërmjet Kosovës dhe Serbisë, teksa u bëri thirrje autoriteteve të Kosovës të angazhohen me plot energji në dialogun me Serbinë, të ndërmjetësuar nga Bashkimi Evropian.
Vizita e Lammy në vendet e Ballkanit Perëndimor, sipas Qeverisë së Mbretërisë së Bashkuar, ka për qëllim kyç forcimin e bashkëpunimit në luftimin e imigracionit të parregullt dhe krimit të rëndë të organizuar.
Gjendja në Bosnje
Lammy tha se me Vuçiqin foli edhe për gjendjen e tanishme në Bosnje e Hercegovinë dhe për veprimet e presidentit të Republikës Sërpska, Millorad Dodik.
“Ne filluam të flasim për atë që më shqetëson mua – veprimet antikushtetuese të presidentit Dodik”, tha Lammy pas takimit.
Megjithatë, Vuçiq deklaroi se nuk pajtohet me mendimin e Lammy mbi situatën në Bosnje e Hercegovinë.
“Nuk mund të pajtohem që veprimet antikushtetuese të Millorad Dodik janë fajtori apo fajtori i vetëm për situatën në Bosnje e Hercegovinë”, tha Vuçiq.
Ai shtoi se Serbia gjithmonë do ta respektojë Marrëveshjen e Dejtonit, dhe në përputhje me të edhe integritetin territorial të Bosnje e Hercegovinës.
“Ne nuk duam asnjë konflikt”, tha Vuçiq.
Gjykata e Bosnje e Hercegovinës kërkoi më 27 mars fletarrestime ndërkombëtare, përmes INTEPOL-it, për Dodikun dhe Nenad Stevandiqin, kryetarin e Kuvendit Popullor të Republikës Sërpska.
Kërkesa për fletarrestime ndërkombëtare u bë pasi ata nuk i ishin përgjigjur thirrjes nga Prokuroria e Përgjithshme e Bosnjës nën dyshimin se kanë shkelur rendin kushtetues të Bosnje e Hercegovinës.
Por të mërkurën, Dodik tha se është njoftuar nga Vuçiqi se INTERPOL-i nuk e ka pranuar kërkesën e gjykatës së Bosnjës për të lëshuar fletarrestime ndërkombëtare kundër tij dhe Stevandiqit.
Vuçiqi nuk ka folur për këtë në konferencën për media me Lammy të mërkurën.
Në takimin mes Lammy dhe Vuçiqit morën pjesë ministrat në detyrë të Serbisë, Sinisha Mali, Marko Gjuriq dhe Ivica Daçiq.
Pas takimit, palët nënshkruan tri memorandume mirëkuptimi./REL
