Në pritjen ceremoniale u shfaq i gëzuar për ardhjen e mysafirit.
Por ka mjaftuar takimi me dyer të mbyllura me kancelarin gjerman, Olaf Scholz, që presidentit të Serbisë, Aleksandër Vuçiq, t’i ndryshojë disponimi plotësisht.
Atë e trishtoi konfirmimi se më herët në Prishtinë, gjermani tha se pa e njohur njëra-tjetrën si shtete të pavarura Kosova dhe Serbia nuk mund të hyjnë në Bashkim Evropian.
“Askush më herët s’ka folur për njohje reciproke, përveç amerikanëve, që e kanë prodhuar këtë doktrinë para tre vjetëve. Askush në Evropë s’e ka kërkuar këtë deri më sot kur dëgjuam atë që u tha në konferencën në Prishtinë. Kjo njohja e ndërsjellë është befasi edhe për ne”.
Serbit i duhet të pranojë realitetin që thotë se e ka parashikuar.
“Gjermania është e fuqishme dhe ne jemi të vegjël. Gjërat po shkojnë në dëm të Serbisë, ashtu siç e kam paralajmëruar. E kam ditur që do të vijë deri te ky moment”.
Scholz që para medieve në Beograd foli me tone diplomatike tha se dihet tashmë qëllimi i dialogut mes dy vendeve dhe se kërkohet urgjent përparim.
Madje, duke mos e përmendur direkt Serbinë, ai tha se shtetet duhet t’i vendosin sanksione Rusisë shkaku i luftës në Ukrainë.
Por, detajet i shpalosi presidenti serb.
“Kancelari në mënyrë të vendosur dhe të ashpër kërkoi nga Serbia që të bashkëngjitet në sanksionet kundër Federatës Ruse, pra në ato masa që tashmë i ka BE-ja kundër Rusisë. Unë fola për pozicionin tonë dhe situatën specifike që e kemi rreth Kosovës në këtë rast, dhe energjetikës”.
Pas Prishtinës dhe Beogradit, Olaf Scholz të premten pasdite ka udhëtuar në Selanik të Greqisë për takim të liderëve të Evropës Juglindore.
