Presidenti i Serbisë, Aleksandar Vuçiq, ka konfirmuar se takimi në Uashington mes Kosovës dhe Serbisë ka gjasa që të shtyhet për datën 3 apo 4 shtator, pasi që, siç ka thënë ai, ka indikacione që në rast se do të ndodhë diçka e rëndësishme në takim do të marrë pjesë edhe presidenti Donald Trump.
“Negociatat do të jenë për të gjitha çështjet për normalizim, por jo për njohje, janë duke u zhvilluar nën drejtimin e Brukselit, por kjo do të jetë krejt diçka tjetër”, ka thënë Vuçiq për Tv Prva.
Vuçiq deklaroi se ishte i shqetësuar për temën e bisedimeve në Uashington dhe Bruksel. Por shtoi se është i gatshëm, i përgatitur dhe e di se çfarë mund të pritet në bisedime të tilla.
“Ju nuk shkoni atje për piknik dhe bisedime të lehta, pavarësisht se për çfarë flasim. Kur flasim për ekonominë, unë e di se shqiptarët nuk do të flasin për këtë. Ata nuk janë të interesuar në bisedime ekonomike fare”, ka thënë ai.
Ai tha se i dërguari i presidentit Trump, Richard Grenell kishte ide të mira.
Po ashtu ka thënë se Presidenti Trump ka një politikë më të mirë ndaj Serbisë sesa administrata e mëparshme.
