Aplikacioni WhatsApp, në pronësi të kompanisë Facebook, mund të marrë një gjobë deri në 50 milion euro për shkelje të rregullave të BE-së për mbrojtjen e të dhënave.
Aplikacioni u akuzua për mosdhënien e informacionit adekuat për përdoruesit në lidhje me ndarjen e të dhënave me Facebook.
Sipas asaj që mësohet nga burimet, javën e ardhshme Komiteti për Privatësinë i BE (EDPB) duhet të diskutojë rastin gjatë seancës plenare të tij me përfaqësuesit e autoriteteve kombëtare të mbrojtjes së të dhënave.
Sanksioni paraprak, mbi të cilin ende po konsultohen agjencitë e ndryshme të privatësisë së BE-së, mund të përfaqësojë një nga më të lartit e vendosur ndonjëherë në bazë të Rregullores së Mbrojtjes së të Dhënave të BE-së (GDPR), në fuqi që nga viti 2018.
WhatsApp mund të marrë një gjobë midis 30 dhe 50 milion euro për mosrespektimin e plotë të kërkesave të transparencës të përcaktuara nga GDPR.
Përveç kësaj, autoritetet e privatësisë mund të kërkojnë që WhatsApp të ndryshojë mënyrën se si trajton të dhënat e përdoruesit për të qenë më transparent.
