Mesfushori i Arsenalit, Granit Xhaka, ka zhvilluar një reputacion të lojtarit të ashpër gjatë kohës së tij në Premier League, me zviceranin që është ndëshkuar me katër kartonë të kuq që nga transferimi i tij te Arsenali në vitin 2016.
Vetëm dy lojtarë aktualë të Premier Leagues janë përjashtuar më shumë se Xhaka në kampionat, ndërsa 45 kartonët e verdhë të mesfushorit bëjnë që ai të ketë normë ndëshkimi në çdo 3.8 ndeshje. Përjashtimi i tij i fundit erdhi në muajin gusht, gjatë humbjes 5:0 ndaj Manchester Cityt dhe tërhoqi kritika të shumta, me disa që mendonin se 29-vjeçari nuk kishte mësuar nga gabimet e së kaluarës.
Megjithatë, pas shikimit të lojtarëve të tjerë që i shpëtojnë sanksionimit për ndërhyrje të ngjashme, Xhaka beson se ndonjëherë mund të trajtohet ndryshe nga futbollisët tjerë, me reputacionin e tij që i paraprin kur del në fushë. Xhaka u përjashtua dy herë me karton të kuq në sezonin e tij të parë te Arsenali dhe një herë në edicionin 2020/21, përpara se ta çonte numrin në katër përjashtime direkte kundër Cityt. Ai u fut në një duel me Joao Cancelon, me ndërhyrjen e tij që u konsiderua si e rrezikshme pavarësisht se Xhaka kishte kontakt me topin. Megjithatë, duke parë incidentet e tjera, Xhaka mendon se do të ishte përjashtuar edhe për ndërhyrjet që nuk sollën të njëjtin dënim edhe për lojtarët e skuadrave tjera.
“Kur i shoh disa ndërhyrje dhe e imagjinoj nëse do të isha unë në atë pozitë. Me siguri se do të përjashtohesha menjëherë. Kjo më bën t’i bëj gjërat në një mënyrë të ndryshme ndonjëherë, sepse e di që rreziku im në krahasim me rrezikun e lojtarëve të tjerë nuk është i njëjtë”, ka thënë Xhaka. “Nëse rrezikoj, e di që jam më afër kartonit të kuq se çdo lojtar tjetër në Premier League. Ndoshta e kam gabim, por kjo është ajo që ndiej. Kështu që, ndonjëherë në një lojë e ndaloj veten të shkoj për ndërhyrje të rrezikshme, sepse nëse marr një karton të kuq, gjithçka fillon përsëri. Unë nuk dua të jap argumente që të tjerët të flasin për mua gjëra që janë marrëzi. Përpiqem të mos rrezikoj shumë”.
Xhaka sugjeroi gjithashtu mënyrën e kartonit të tij të kuq kundër Burnleyt sezonin e kaluar, kur ai e kapi Ashley Westwoodin për fyti, e ka formuar mënyrën se si gjyqtarët e kanë parë atë që atëherë.
“Kur një herë mora një karton të kuq, arbitri i tha njërit prej bashkëlojtarëve të mi, ‘Ti e di se si është Graniti, ai humb kokën’. Ky është vlerësimi që ata e kanë për mua”, tha ai. “Kjo është e gabuar. Vetëm sepse humba kokën kundër Burnleyt, për shembull, nuk është se e humbas kokën çdo herë. Mendoj se është e gabuar që ata të mendojnë se gjithmonë jam i njëjti”.
Xhaka është një nga 22 lojtarët që kanë marrë karton të kuq në Premier League këtë sezon. Ai do të ketë një shans për të kompensuar përjashtimin e tij në ndeshjen e ardhshme të Arsenalit, të cilën e luan në shtëpi kundër Manchester Cityt në ditën e Vitit të Ri.
Xhaka po ashtu ka pranuar se ai dhe tifozët e Arsenalit mund të mos jenë kurrë “miqtë më të mirë” edhe pse tani ndjenë më shumë dashuri sesa në vitet e shkuara. Mesfushori ka qenë gjithmonë një figurë përçarëse mes tifozëve të Arsenalit dhe tensionet arritën në pikën e vlimit në muajin tetor të vitit 2019. Gjatë ditëve të fundit të Unay Emeryt si trajner i Arsenalit, Xhaka, atëherë kapiteni i klubit, reagoi me zemërim ndaj shakave nga turma kur ai u zëvendësua në barazimin me Crystal Palacen. Derisa e lëshoi fushën, Xhaka u fjalos me tifozët në tribuna. Për shpërthimin e tij, zviceranit iu hoq shiriti i kapitenit dhe karriera e tij te Arsenali dukej se mori fund, por gjërat kanë ndryshuar që atëherë.
“Pas asaj që ndodhi dy vjet më parë ne ishim shumë larg njëri-tjetrit”, tha Xhaka. “Mendoj se po afrohemi hap pas hapi gjithnjë e më shumë. Nuk besoj se do të jemi miqtë më të mirë. Por ajo që mund t’u them njerëzve është se që nga dita e parë deri në ditën e fundit që jam këtu, do të bëj gjithçka për klubin”.
Xhaka tani është sërish titullar nën drejtimin e Mikel Artetas, por mesfushori e pranon me lehtësi se ai nuk është artikulli i përfunduar.
“Unë do të bëj gabime, sepse të gjithë bëjnë. Ne nuk jemi perfektë. Por unë do të jap 100 për qind në çdo seancë stërvitore dhe në çdo ndeshje. Ky është mesazhi im për tifozët. Ndonjëherë ka keqkuptime dhe besoj se kjo ishte arsyeja e vetme e problemit që kishim mes nesh”, shprehet Xhaka. “Ndiej shumë më tepër dashuri se një apo dy vjet më parë, por është një proces i ngadaltë që duhet të bëjmë me njëri-tjetrin”.
Xhaka së fundmi u rikthye në fushë pas një mungese prej gati tre muajve për shkak të lëndimit dhe shënoi gol në fitoren e thellë të Arsenalit ndaj Norwichit 5:0.
