Punonjësit e Drejtorive Rajonale të Trashëgimisë Kulturore në të gjithë vendin janë në gatishmëri maksimale dhe fatmirësisht në zonat më të prekura nga reshjet e shiut, ku ka patur dhe përmbytje në Shkodër e Lezhë, nuk hasen problematika të mëdha në monumentet e kulturës.
Ministrja e Kulturës, Elva Margariti bëri të ditur se i vetmi monument kulture i përmbytur është Xhamia e Plumbit, Shkodër.
“Në këtë situatë të ngarkuar për shkak të reshjeve të ditëve të fundit, punonjësit e drejtorive Rajonale të Trashëgimisë Kulturore në të gjithë vendin janë në gatishmëri maksimale. Pas inspektimeve në terren u konstatua se edhe në zonat, ku janë shkaktuar përmbytjet më të shumta, në Lezhë e në Shkodër, nuk hasen problematika të mëdha në monumentet e kulturës. I vetmi monument i përmbytur është Xhamia e Plumbit, Shkodër, për restaurimin dhe sistemimin e së cilës, sapo nënshkruam një marrëveshje me Qeverinë Turke”, deklaroi Margariti./ATSH/
