Fitorja e Liverpoolit me rezultatin 2:1 ndaj Bournemouthit të shtunën u prit me një ndjenjë të pazakontë të çlirimit në “Anfield”.
Liverpooli ka fituar 22 ndeshje rresht në ligë në shtëpi dhe ka krijuar një epërsi prej 25 pikëve në krye të Premier Leagues.
Por, aq impresive ishte seria e Liverpoolit, sa që tri humbje në tri gara të ndryshme në katër ndeshjet e fundit, u konsiderua si krizë, shkruan agjencia AFP të martën.
Humbja 3:0 në udhëtim ndaj Watfordit i shoi shpresat lojtarëve të Juergen Kloppit që të barazojnë rekordin e Arsenalit për të mbaruar stinorin në ligë pa humbje. E eliminimi në FA Cup nga Chelsea, nënkupton se Liverpooli nuk mund të përsëris suksesin e Manchester Unitedit, që fitoi tripletën në stinorin 1998/99.
Mirëpo, dëmi më i madh nga ato tri humbje mund të jetë prapë ajo e pësuar 1:0 në udhëtim nga Atletico Madridi në ndeshjen e parë të 1/8 së finales të Ligës së Kampionëve. Liverpooli shpreson të përmbysë rezultatin në ndeshjen e kthimit në “Anfield” të mërkurën.
“Është stinor i gjatë dhe mund të shihni se sa shumë ndeshje kemi luajtur. Pavarësisht se në çfarë sporti je, është e pamundur të jesh në nivelin më të lartë gjatë gjithë vitit”, ka thënë mesfushori i Liverpoolit, James Milner. “Natyrisht se e jep më të mirën, por nganjëherë gjërat nuk shkojnë siç planifikon. Në ato momente duhet të gjesh një mënyrë për të fituar”.
Kur është në formën më të mirë, Liverpooli ka treguar se është në gjendje të bëjë kthesë në ndeshjet e kthimit. Rikthimin më të madh e arriti kur e mposhti Barcelonën 4:0 në ndeshjen e kthimit gjysmëfinale të Ligës së Kampionëve, pasi kishte humbur 3:0 ndeshjen e parë në udhëtim.
Mirëpo, ka disa pika të dobëta te klubi anglez që Atletico Madridi do të synojë të shfrytëzojë.
Pasi mbajti portën e pa prekur në dhjetë nga 11 ndeshje në ligë nga fillimi i dhjetorit deri në mesin e shkurtit, Liverpooli ka pranuar gol në secilën nga pesë ndeshjet e fundit.
Lëndimi i portierit Alisson Becker po ashtu është goditje e rëndë për Liverpoolin. Zëvendësuesi i tij Adrian ishte fajtor në golin e parë të pësuar në humbjen nga Chelsea në FA Cup.
Mungesa e Jordan Hendersonit në mesfushë po ashtu është ndjerë, pasi ai mori një lëndim në ndeshjen e parë ndaj Atleticos. Mirëpo, Henderson mund të kthehet në ndeshjen e të mërkurës.
Forma e sulmuesit Roberto Firmino po ashtu është shqetësuese.
Braziliani ende nuk ka shënuar në “Anfield” këtë stinor.
Por, Liverpooli së paku mund të mbështetet në përkrahjen e tifozëve të flakët në Anfield.
Klopp kurrë nuk ka humbur një ndeshje si vendas në shtëpi që kur mori drejtimin e Liverpoolit në vitin 2015 dhe ka arritur në tri finale që nga atëherë.
“Njerëzit tanë janë të gatshëm. Mirësevini në Anfield! Nuk ka mbaruar ende”, paralajmëroi Klopp pas humbjes në ndeshjen e parë në Madrid.
Ndryshe nga ndeshjet në Itali, Francë e Spanjë nuk ka pasur urdhër që ndeshjet të luhen pa shikues në Britani të Madhe për të parandaluar përhapjen e koronavirusit.
Paris Saint-Germaini në anën tjetër do të pres të mërkurën Borussia Dortmundin në Ligën e Kampionëve pa shikues. Po ashtu pa shikues do të luhet edhe ndeshja e Juventusit me Lyonin javën e ardhshme, në rast se luhet ajo ndeshje.