Zelanda e Re ka pezulluar traktatin e saj të ekstradimit me Hong Kongun, si reagim ndaj ligjit të ri të sigurisë nacionale të Kinës të vendosur në Hong Kong, ka njoftuar BBC.
Ligji shumë i kritikuar e bën më të lehtë për të ndëshkuar protestuesit dhe redukton autonominë e qytetit. Këshillat për udhëtim po ashtu janë përditësuar ku zelandezët janë paralajmëruar për rreziqet që mund t’u paraqiten nga ky ligj.
Ambasada e Kinës në Zelandë të Re ka thënë se pezullimi është “ndërhyrje e rëndë në marrëdhëniet e brendshme të Kinës”.
“Vendimi i Qeverisë së Zelandës së Re është shkelje serioze e ligjit ndërkombëtar dhe normave bazë të marrëdhënieve të jashtme”, thuhet në komunikatë.
Kanada, Austria dhe Britania e Madhe më herët kanë pezulluar traktatet e ekstradimit me Hong Kongun.
