Presidenti i Ukrainës Volodymyr Zelensky bëri të ditur sot se Shërbimi i Sigurisë së Ukrainës (SBU) po zhvillon operacione të suksesshme kundër Rusisë, disa prej të cilave kanë dhënë tashmë rezultate të prekshme, ndërsa të tjera vazhdojnë.
Ai ka aprovuar edhe operacione të reja speciale.
Pas raportit nga kreu aktual i SBU-së, Yevhenii Khmara, Zelensky theksoi se veprimet e shërbimit po kryhen saktësisht sipas nevojave të Ukrainës, duke kundërshtuar çdo formë sabotazhi, bashkëpunimi dhe aktiviteti rus në territorin ukrainas.
Në takim me Kyrylo Budanov (kreun e inteligjencës ushtarake), presidenti diskutoi forcimin e politikës së sanksioneve.
“Çdo humbje ruse na afron fundin e luftës. Goditjet tona të thella dhe masat speciale duhet të vazhdojnë patjetër. Ritmi i sanksioneve duhet të jetë shumë më i lartë. Institucionet tona dhe ato të partnerëve duhet të punojnë më aktivisht në këtë drejtim”, u shpreh Zelensky.
Ai theksoi se prodhimi rus i raketave dhe droneve varet plotësisht nga komponentët e huaj, prandaj bllokimi i furnizimeve dhe zgjerimi i sanksioneve mbetet prioritet kyç.
Ritmi i sanksioneve duhet të rritet ndjeshëm, dhe kjo duhet të jetë prioritet edhe për partnerët.
Zelensky vuri në dukje se Kongresi amerikan po ecën përpara me sanksione më të ashpra ndaj naftës ruse, çka mund të ketë efekt real.
“Dialogu me SHBA-në duhet të jetë 100% konstruktiv. Ukraina kurrë nuk ka qenë dhe nuk do të jetë pengesë për diplomacinë”, shtoi ai.
Ukraina po monitoron dhe dokumenton përpjekjet ruse që synojnë të minojnë marrëdhëniet me partnerët – përmes lobistëve, operacioneve të brendshme në Ukrainë dhe Evropë.
