“Nuk ka aksidente në kohë lufte”. Janë fjalët e Presidentit Volodymyr Zelensky, lidhur me ngjarjen e ndodhur në periferinë e Kievit, ku 14 persona, përfshirë pjesëtarë të kabinetit qeveritar, humbën jetën pas rrëzimit të një helikopteri.
Ukraina nuk ka pretenduar përfshirjen e Rusisë, por gjatë fjalës së tij në forumin ekonomik të Davosit, Zelensky tha se tragjedia ishte pasojë e luftës. Ai e shfrytëzoi fjalimin e tij për t’i kërkuar aleatëve të dërgojnë me shpejtësi më shumë armë, para ofensivës së re ruse. “Furnizimet me tanket perëndimore duhet të paraprijnë një tjetër pushtim me tanket ruse. Koha që bota e lirë po kalon duke menduar po përdoret nga shteti terrorist për të vrarë”, tha ai.
Deklarata u interpretua si një kërkesë për Gjermaninë që të marrë shpejt vendimin, për dërgimin e tankeve të shumëkërkuara nga Kievi, Leopard. Berlini heziton të ndërmarrë një hap të tillë, nëse shtetet e bashkuara nuk zotohen për t’i siguruar Ukrainës tanket e veta të betejës, Abrams. Është Britania e Madhe që ka guxuar të shkojë më tej në mbështetjen për Ukrainën, duke premtuar të dërgojë atje tanket Challenger.
Shpresëdhënës për Kievin ishte mesazhi I shefit të NATO-s në Forumin e Davosit, I cili tha se Ukraina mund të sigurojë armatime më të rënda dhe të avancuara. “Disa aleatë kanë njoftuar se janë gati të dërgojnë tanke më të avancuara dhe po zhvillohen bisedime e konsultime mes aleatëve. Të premten do të takohemi në bazën e Ramstein në Gjermani për të diskutuar mbi mbështetjen ushtarake”, tha Stoltenberg.
Morali i Kievit mori një goditje të rëndë të mërkuren pas vdekejs se ministrit të Brendshëm Denys Monastyrsky dhe dy zyrtarëve të tjerë të lartë, si pasojë e rrëzimit të helikopterit në periferi të Kievit. Nuk ka tregues se ngjarja mund të ketë qenë diçka tjetër përveç se aksident, por shërbimet sekrete thanë se po konsideronin disa pista të mundshme, përfshirë sabotimin, keqfunksionimin teknik ose shkelje të rregullave të fluturimit.
