Presidenti i Ukrainës, Volodymyr Zelensky ka deklaruar se plani i presidentit të SHBA-së, Donald Trump, për armëpushimin në Gazë ofron “shpresë” se një qasje e ngjashme mund të ndihmojë në përfundimin e luftës mes Rusisë dhe Ukrainës.
Në një intervistë për Fox News, Zelensky theksoi se suksesi i Trump në Lindjen e Mesme mund të shërbejë si model për të ushtruar presion ndaj Rusisë.
“Sigurisht, kjo na jep sinjale dhe shpresë se me presionin që presidenti Trump përdori në Lindjen e Mesme për të sjellë paqen, shpresoj që ai të përdorë të njëjtin instrument – madje edhe më shumë – për t’i bërë presion Putinit që të ndalojë luftën në Ukrainë,” u shpreh Zelensky.
Ai vuri theksin te rëndësia e sanksioneve sekondare ndaj Rusisë, duke i cilësuar ato si “shumë të dhimbshme” për ekonominë ruse.
“Të gjithë e kuptojnë se sanksionet sekondare janë të rëndësishme. Kjo varet nga vullneti i Presidentit Trump… dhe unë i bëj thirrje atij të mbështesë këtë paketë sanksionesh sekondare,” tha presidenti ukrainas.
Zelensky vlerësoi përparimin e Evropës në uljen e varësisë nga energjia ruse, duke theksuar se Evropa ka “reduktuar 80% të kontratave të saj për energji gjatë gjithë kësaj periudhe të luftës.”
Megjithatë, ai shtoi se “kjo nuk mjafton” për të ndalur plotësisht ndikimin ekonomik të Rusisë.
Reagimi i Zelenskyt vjen pas bisedës së dytë telefonike të tij me Trumpin gjatë fundjavës.
Ai e përshkroi bisedën e së shtunës si “shumë produktive”, ndërsa biseda e dytë u përqendrua në mbrojtjen e Ukrainës dhe çështje të tjera të rëndësishme.
Ndërkaq, një delegacion ukrainas, i përbërë nga kryeministrja Yulia Svyrydenko, kreu i Zyrës Presidenciale të Ukrainës, Andriy Yermak, dhe komisioneri për Politikën e Sanksioneve, Vladyslav Vlasiuk, pritet të udhëtojë drejt Shteteve të Bashkuara gjatë kësaj jave.
Vizita synon të forcojë bashkëpunimin me administratën amerikane dhe të diskutojë mbështetjen e mëtejshme për Ukrainën, përfshirë sanksionet dhe ndihmën ushtarake.
Nga ana tjetër, Rusia vijon sulmet me dronë dhe raketa ndaj Ukrainës, duke shkaktuar dëme të mëdha në infrastrukturën energjetike dhe viktima në civilë.
Përpjekjet për të siguruar mbështetje ndërkombëtare dhe për të shtuar presionin ndaj Rusisë përmes sanksioneve dhe ndihmës ushtarake mbeten prioritete kryesore për Ukrainën.
Samiti i ardhshëm dhe bisedimet me SHBA-në pritet të luajnë një rol vendimtar në përcaktimin e hapave të ardhshëm për t’i dhënë fund konfliktit.
/rtsh.al/
