Akraballëku në diplomaci është goditur nëpërmjet një konkursi të brendshëm, të shpallur një ditë më parë nga Ministria e Punëve të Jashtme. Konkursi është për 23 pozita nëpër ambasada e konsullata të Kosovës gjithandej botës, që mbahen jashtëligjshëm kryesisht nga të afërm të të fortëve të politikës.

“Koha Ditore” e ka siguruar të enjten përmbajtjen e konkursit, i cili flet për zëvendësimin me urgjencë që do të bëhet për këto pozita në 13 misione të ndryshme. Në të mund të aplikohet me e-mail dhe është i vlefshëm vetëm për zyrtarët që kanë grada të rregullta diplomatike. Një konkurs tjetër është paralajmëruar të shpallet shpejt, shkruan KOHA.

“Pas përmbylljes së këtij konkursi, në të cilin janë shpallur pozitat vakante që kërkohen të mbulohen me urgjencë dhe pozitat me grada kryesisht të larta, do të shpallet konkursi i radhës, i cili do të trajtojë kryesisht pozitat me grada më të ulëta”, thuhet në një e-mail të Ministrisë, dërguar stafit.

Në një tjetër tregohet se kush mund të aplikojë.

“Të drejtën e shprehjes së interesit e kanë të gjithë nëpunësit e Ministrisë me grada diplomatike apo konsullore, si dhe anëtarët e shërbimit të jashtëm që aktualisht janë me detyrë në misione diplomatike apo poste konsullore, të cilët kanë shërbyer së paku 2 vjet në të njëjtin mision”, thuhet në e-mailin tjetër. “Zyrtarët e interesuar të cilët i plotësojnë kushtet, do të mund të aplikojnë në të gjitha pozitat pa kufizime”.