Katër kandidatë të grupimit Alibeaj, të regjistruar në listën e Partisë Demokratike për zgjedhjet vendore të 14 majit janë tërhequr nga gara.
Sipas informacioneve të siguruara nga A2 CNN, bëhet fjalë për Sandër Markun në Lezhë, Genc Doçin në Kurbin, Gjergji Gjatën në Korçë dhe Bujar Vreton në Librazhd.
Kandidati i Korçës, Gjata, konfirmoi zyrtarisht tërheqjen nga gara bashkë me 40 kandidatët për Këshillin Bashkiak.
Tërhiqemi nga gara elektorale (në mënyrë të parevokueshme) për Zgjedhjet Vendore 2023, për mungesë të procedurave vendimmarrëse në organet drejtuese të PD lidhur me kandidimet, si dhe për shkelje të integritetit dhe dinjitetit të të gjithë kandidatëve, cenuar nga vendime personale dhe jo kolegjiale. Urojmë më të mirën për Korçën dhe suksese për kandidatët më të mirë në të gjithë vendin.
(Procedurën zyrtare do e kryejmë sipas rregullave që parashikon ligji, pranë KQZ.)
Gjergji Gjata, ish-kandidati i Alibeajt për Korçën
Sipas informacioneve, Alibeaj gjithsej ka dorëzuar 17 emra kandidatësh, të cilët asnjëherë nuk i ka bërë publikë për mediat.
Gjatë prezantimit të kanditatit për Tiranën, Roland Bejko, Enkelejd Alibeaj theksoi se deri në afatet e fundit grupimi i tij dorën e ka pasur të shtrirë për grupimin e Rithemelimit, por si përgjigje kanë marrë vetëm refuzim për bashkëpunim. Po ashtu, ai u shpreh se Belind Këlliçi, kandidati i “Rithemelimit” për kryetar të bashkisë Tiranë, e ka pasur mundësinë për të garuar nën siglën e PD-së. Por Alibeaj shtoi më tej, tashmë Këlliçi do të garojë “nën siglën e një partie të majtë siç është Partia e Lirisë” e Ilir Metës.
Kreu i komanduar i PD-së solli po ashtu në vëmendje se vijon të mbetet i mendimit që grupimi i tij duhej të kishte 61 përfaqësues në zgjedhjet vendore.
