Komisioneri Shtetëror i Zgjedhjeve (KZAZ), Ilirjan Celibashi, ka dalë në një deklaratë për mediat pas mbylljes zyrtare të procesit të votimit në të pesë bashkitë ku u zhvilluan zgjedhjet e pjesshme vendore: Vlorë, Berat, Cërrik, Tepelenë dhe Mat.
Celibashi bëri një pasqyrë të përgjithshme mbi shkallën e pjesëmarrjes së votuesve në këto bashki, duke ofruar një panoramë mbi angazhimin e qytetarëve në zgjedhjen e kryetarëve të rinj të bashkive.
Numërimi dhe finalizimi i rezultateve
Në lidhje me procesin e numërimit, Komisioneri bëri të ditur se pritet që ai të nisë rreth orës 22:00 të së dielës. Ky proces është planifikuar të jetë intensiv dhe të finalizohet deri të hënën në mesditë.
“Procesi i numërimit pritet të finalizohet deri të hënën në mesditë, nga ku do të zyrtarizohen edhe fituesit e garës për kryebashkiak në këto 5 bashki,” theksoi Celibashi.
Risi në Tepelenë, vlerësim me Inteligjencë Artificiale
Elementi më i veçantë i deklaratës së Celibashit ishte njoftimi për implementimin e një teknologjie të re në Bashkinë Tepelenë.
Në Tepelenë, procesi i vlerësimit të fletëve të votimit do të kryhet edhe nëpërmjet Inteligjencës Artificiale (AI). Kjo metodë inovative, e cila ka për qëllim rritjen e transparencës dhe saktësisë, do të transmetohet live në faqen zyrtare të KQZ-së. Ky hap shënon një zhvillim të rëndësishëm teknologjik në administrimin e zgjedhjeve në vend.
Mekanizimi i funksionimit të IA-së
Celibashi shpjegoi edhe mekanizmin e funksionimit: “Në çdo tavolinë kemi të instaluar kamera që regjistrojnë procesin e numërimit të fletëve, fletët vendosen mbi tavolinë, filmohen. Ajo çfarë kemi bërë ne dhe ku e përdorim, është që të gjitha këto filmime, nëpërmjet një programi kompjuterik me IA do të bëjë leximin automatik, sistemit kamera, të fletës së votimit.”
Ai theksoi edhe përfitimin kryesor të përdorimit të IA-së.
“Do ta kuptojë ky sistem duke përdor IA se për kë është votuar dhe rezultati vjen automatikisht në KQZ, pa pritur që të bëhet tabulimi i rezultatit nga anëtarët e grupit të numërimit. Çdo fletë votimi vjen dhe transmetohet në KQZ.”, tha ai.
Celibashi: KQZ po verifikon incidentet në Cërrik dhe Vlorë
Kryekomisioneri Shtetëror i Zgjedhjeve (KQZ), Ilirjan Celibashi, ka njoftuar se procesi zgjedhor në të pesë bashkitë ku u votua sot ka kaluar pa probleme të rënda. Ai theksoi se deri më tani janë evidentuar vetëm dy problematika të izoluara, të cilat janë në proces verifikimi.
“Nuk rezulton të ketë problematika të zhvillimit të procesit,” tha Celibashi, duke garantuar se situata ishte e qetë.
Ai shpjegoi dy rastet që kanë tërhequr vëmendjen e KQZ-së:
Cërrik
Një incident lidhur me sjelljen e një vëzhguesi. Celibashi tha se po verifikohet nëse “ky vëzhgues ka qenë duke parë se për kë po votonte votuesi.”
Vlorë
Një diskutim procedural ndërmjet kryetares së Qendrës së Votimit (QV) dhe operatorit mbi procedurat e identifikimit.
“KQZ po e verifikon se cila ka qenë zgjedhja e secilit prej këtyre dy funksionarëve,” sqaroi Kryekomisioneri.
Celibashi: Pjesëmarrja e ulët nuk i bën zgjedhjet ilegjitime në mënyrë absolute
I pyetur drejtpërdrejt nëse zgjedhja e një kryetari me një pjesëmarrje të ulët do të ishte legjitime, Celibashi theksoi se, pavarësisht shifrës, rezultati nuk mund të konsiderohet automatikisht i paligjshëm.
“E kemi bërë këtë diskutim sot këtu edhe më përpara. Nëse do të duhet të kemi një kufi të pjesëmarrjes për të konsideruar zgjedhje të vlefshme. Ka vende që e kanë dhe ka që s’e kanë. Nëse 12% e qytetarëve të Vlorës kanë dashur të marrin pjesë, do të thotë se ai është vullneti i tyre, por kjo nuk i bën zgjedhjet ilegjitime në mënyrë absolute,” deklaroi Celibashi.
Celibashi argumenton se pjesëmarrja, sado e ulët, mbetet një shprehje e vullnetit të qytetarëve që vendosën të votojnë, dhe se abstenimi i shumicës nuk shfuqizon zgjedhjen e pakicës pjesëmarrëse.