Votuesit në Serbi votojnë sot në zgjedhjet presidenciale, ku lideri populist Aleksandër Vuçiç, i cili mburret për lidhjet personale me rusin Vladimir Putin, pritet të fitojë një mandate të pestë.
Sfiduesi kryesor i Vuçiçit në këto zgjedhje është ish-shefi i ushtrisë Zdravko Ponosh, një gjeneral në pension, që doli rishtazi si kandidat i kampit opozitar pro Bashkimit Evropian.
Qytetarët me të drejtë vote në serbi thonë fjalën e tyre edhe në zgjedhjet parlamentare, ku gjithashtu pritet të dominojë partia përparimtare serbe ne pushtet. Njëkohësisht po mbahen zgjedhjet lokale për disa komuna, përfshirë edhe për kryeqytetin serb, Beograd.
Në zgjedhjet parlamentare serbe marrin pjesë edhe partitë shqiptare, të cilat do të garojnë me dy lista: Koalicioni i Shqiptarëve të Bashkuar dhe Alternativa Demokratike Shqiptare, me gjithsej 20 kandidatë.
Ndërkaq, serbët në Kosovë, me shtetësi të dyfishte do të votojnë në komunat brenda Serbisë, pasi Qeveria e Kosovës nuk lejoi që këto zgjedhje të mbahen brenda territorit të shtetit. Kosova tha se i kishte kërkuar Serbisë që t’i dërgonte kërkesë Qeverisë në Prishtinë për mbajtjen e zgjedhjeve, por Beogradi nuk pranoi.
Mëngjesin e së dielës, më shumë se 25 autobusë u panë në stacionin e autobusëve në Mitrovicë të Veriut, për të transportuar serbët për të votuar në Rashkë, një nga katër komunat serbe pranë kufirit me Kosovën. Rreth 100,000 qytetarë serbë që jetojnë në Kosovë, do të mund të ushtrojnë atje të drejtën të votës.
