Vijon debati për zgjerimin e Greqisë me 12 milje në detin Jon. Ish-presidentin Bujar Nishani në një postim në Facebook është shprehur se kryeministri Edi Rama ka tradhtuar interesin kombëtar.
Ai shkruan se Edi Rama jo vetëm që refuzon të tregojë dhe mbrojë interesin e Shqipërisë, por më zi akoma, bëhet avokat i interesit të Greqisë duke i dhënë të drejtë për zgjerimin me 12 milje.
“Kryeministri i Shqipërisë merr përsipër t’i tregojë shqiptarëve se zgjerimi i territorit detar të Greqisë në 12 milje është një e drejtë e Greqisë dhe se Shqipëria nuk ka pse ankohet!!!!! Skandal më të madh e më të zi, nuk mund të ketë! Se cili është interesi dhe e drejta e Greqisë është detyra e Kryeministrit të Greqisë ta tregojë e ta mbrojë! Kryeministri i Shqipërisë ka detyrën dhe përgjegjësinë të mbrojë dhe të tregojë interesin e Shqipërisë. Kryeministri i Shqipërisë jo vetëm refuzon të tregojë dhe mbrojë interesin e Shqipërisë, por më zi akoma, bëhet avokat i interesit të tjetrit, interes që dëmton rëndë interesin e Shqipërisë! Tradhtia ka Emër!” shkruan ai.
Por cfarë tha Edi Rama për zgjerimin e Greqisë me 12 milje? “Llumi nacional-folklorik i politikës shqiptare pa kufij, pa din e iman, është derdhur sërish në oqeanin digjital përmes shpifjes së madhe të “shitjes së detit” Greqisë! Këtë marrëzi ekstreme për përfitime politike mund ta besojnë vetëm ata që s’duan të dëgjojnë e as të kuptojnë” tha kryeministri, ndër të tjera.
