Ministria e Bujqësisë dhe Zhvillimit Rural ka hapur procesin e konsultimit publik për projektvendimin “Për miratimin e dokumentit udhëzues të politikave mbi Zonat e Përcaktuara në Akuakulturë (ZPA) në Shqipëri.
Qëllimi i hartimit të këtij projektvendimi është miratimi i dokumentit udhëzues të politikave mbi Zonat e Përcaktuara për Akuakulturë (ZPA) në Shqipëri.
Projektvendimi bazohet edhe në pikën 2, të nenit 5, të Ligjit “Për akuakulturën”, i cili thotë se ZPA-ja përgatitet dhe koordinohet me nismën e ministrisë, në konsultim me ministritë përgjegjëse në fushën e planifikimit të territorit, përdorimin e hapësirës detare dhe tokësore, transportit, përdorimin e burimeve ujore, mbrojtjes së mjedisit, turizmit, ekonomisë dhe trashëgimisë kulturore dhe me organet e pushtetit vendor.
“Zonat e përcaktuara për akuakulturë miratohen me vendim të Këshillit të Ministrave. Nëse një ZPA e propozuar shtrihet në një zonë kufitare me një zonë të mbrojtur, procesi i miratimit të saj nga këshilli i Ministrave, duhet të përfshijë një konsultim publik me grupet e interesit dhe institucionet shkencore.”- thuhet në ligj.
Dokumenti udhëzues i politikave, që publikohet nga rtsh.al, propozon krijimin e ZPA-ve bazuar në njohuritë më të mira shkencore dhe social- ekonomike të disponueshme, të siguruara nga institucionet përgjegjëse kombëtare.
“ZPA-të janë zona të përcaktuara gjeografikisht, të kufizuara nga një poligon, në të cilat lejohen ose kufizohen të gjitha ose disa aktivitete të akuakulturës për të nxitur zhvillimin e akuakulturës në një zonë specifike. ZPA-ja përfshin zona të veçanta, të caktuara, me qëllim aktivitetin e akuakulturës, së bashku me infrastrukturën në shërbim të saj.”- thuhet në projektvendim.
Krijimi i ZPA-ve, sipas relacionit, do të sigurojë një integrim më të mirë të akuakulturës në zonat bregdetare dhe është një parakusht për dhënien e lejeve dhe qirave të reja për akuakulturë.
Këto të fundit janë thelbësore për të pasur një kornizë rregullatore dhe administrative kushtuar akuakulturës dhe për të siguruar një zhvillim të qëndrueshëm të sektorit.
