Zotëri prokuror,
Merreni këtë çantë dhe bashkë me të, masa urgjente, që t’i arrestoni njerëzit të lidhur me krimin. Ne kemi zbuluar se në restorantin “Ali Baba”, i cili gjendet jo larg prej kësaj gjykate, ka zënë fill, ky lloj krimi.
Përcollëm me vëmendje çdo lëvizje të njerëzve, me mikun tim, Shigjeta. Rrezikuam shumë duke u shtirë si qen rrugësh (ndonëse si të tillë po trajtohemi ende nga njerëzit), sepse kaq vite paslufte, nuk u pa e arsyeshme të na ngrehin një strehimore.
Prandaj, ju e dini çfarë do të thotë të jeni pa çati mbi kokë. Jetojmë në këtë vend, keq e më keq! Në shi dhe borë dhe në të shumtën e kohës të uritur. Ju keni braktisur Bucin, që ju ka shërbyer gjatë luftës me nder. Askush nuk qanë kokën për ne. Nuk dua të zgjatem më shumë, ju lutem ndërprisni këto krime, sa më parë, sepse kështu do të mund të shkatërrohen çdo ditë, shumë jetëra të racës suaj njerëzore.
Prokurori mbeti i hutuar, pa pasur nevojë të lëvizte asnjë hap më tutje. Lola po ia dorëzonte çantën. Ai tundi kokën në shenjë falënderimi dhe bëri me dorë që të prisnin pak.
Si duket i telefonoi dikujt nga gjykata, i cili erdhi me shpejtësi, duke shkrepur disa fotografi, ku Shigjeta i hodhi putrën në qafë Lolës. Të dy, po bëheshin dëshmitarë, zbulues të një krimi të madh, i cili do t’i mbetej në ndërgjegjën e prokurorit të kësaj gjykate, t’i shkonte gjer në fund kësaj pune, se ku e ka vërtetë kokën e ku bishtin!?
Të dy qentë, pasi u siguruan se mund të largoheshin, tundën kokën në shenjë përshëndetje. Po ia mësynin një rruge, e cila ua bënte të mundur ta shmangnin çdo takim me zonjat, apo me të gjithë ata, që ishin vënë në përndjekjen e tyre. Jo për ta ndaluar krimin, por për ta mbrojtur dhe fshehur krimin.
Për t’i zënë ngushtë një qen dhe një qenushe, që me ashpërsinë më të madhe t’i zhduknin si dëshmitarë, të një dëshmie, e cila ju dorëzua një prokurori, që përveç detyrimit ligjor, ai do të dëshmonte, se u përballë me veprimet e një krijese me katër këmbë, që po sprovonte ndërgjegjën e njeriut si mëkëmbës i këtij vendi.
Fragment nga romani: “Qentë e Gërmisë”, që pritet të botohet së shpejti.
