Të gjithë ata punonjës që janë pjesë e Policisë së Burgjeve dhe që janë të pastrehë, tani kanë rastin të përfitojnë kredi me kushte lehtësuese për strehim.
Diskutimet në qeveri për këtë çështje nisën rreth 4 muaj më parë, por vetëm tani Kuvendi, nëpërmjet një ndërhyrje në ligjin “Për Policinë e Burgjeve”, ka vendosur që tu njohë të drejtën policëve të burgjeve për përfitim kredie me kushte lehtësuese për strehim.
Tashmë ky vendim i Kuvendit ka marrë formën përfundimtare, pasi është publikuar edhe në Fletoren Zyrtare.
Të drejtën për të përfituar kredi me kushte lehtësuese për strehim e ka çdo punonjës i Policisë së Burgjeve, që ushtron veprimtarinë e tij në nivel qendror, në institucionet e ekzekutimit të vendimeve penale, si dhe gjatë transferimeve e shoqërimeve të personave të dënuar dhe të paraburgosur.
Trajtimi ekonomik dhe financiar
Punonjësit e Policisë së Burgjeve përfitojnë trajtimin ekonomik dhe financiar, ku përfshihet paga mujore, e cila përbëhet nga paga për gradë, shtesa për çdo vit vjetërsie shërbimi dhe shtesa për natyrë të veçantë pune, kompensim për kostot shtesë për largësi nga vendbanimi, pagesat për transport apo qiranë e banesës dhe ushqimin.
Punonjësit e Policisë së Burgjeve kanë të drejtën e përfitimit sipas legjislacionit në fuqi për sigurimin shoqëror suplementar.
Si funksionon skema për të marrë kredi për strehim me kushte lehtësuese
Vetëm pak javë më parë, rtsh.al publikoi skemën se si funksionon marrja e kredive me kushte lehtësuese.
Në vija të përgjithshme masa e subvencionimit të interesave të kredisë për ata që përfitojnë kredi të lehtësuara nga shteti për banesat me kosto të ulët, do të jetë e barabartë me diferencën që rezulton midis interesit vjetor të kredisë në tregun e lirë, me interesin në varësi të aftësisë përballuese të familjes, me kusht që interesi dhe principali që paguan familja të mos jenë më të mëdha së aftësia e familjes për të përballuar.
Llogaritja e masës së subvencionimit të kredisë hipotekore me kushte lehtësuese bëhet në momentin e lidhjes së kontratës për marrjen e kredisë midis individit/familjes përfituese dhe institucionit financiar, mbështetur në marrëveshjen e nënshkruar midis institucionit financiar dhe ministrisë përgjegjëse për strehimin, në rastin konkret të ministrisë së Drejtësisë.
Procedurat
Procedura e dhënies së subvencionimit të interesave të kredisë për familjet që përfitojnë banesë me kosto të ulët me kredi fillon me përzgjedhjen e institucionit financiar që do të kreditojë familjet. Përzgjedhja e institucionit financiar që do të kreditojë familjet bëhet me procedurë konkurrimi, si vijon:
- nëpërmjet një oferte publike dhe transparente ftohen të gjitha institucionet financiare që kryejnë shërbime për dhënien e kredive në territorin e Republikës së Shqipërisë;
- oferta publike shoqërohet edhe me kriteret për vlerësimin e ofertës fituese;
- vlerësimi i ofertave duhet të marrë parasysh kostot më të ulta për buxhetin dhe kostot më të përballueshme për familjet.
Përzgjedhja
Përzgjedhja e institucionit financiar me ofertën fituese bëhet nga një komision vlerësimi që ngrihet me urdhër të titullarit të institucionit që financon programin me përfaqësues të ministrisë përgegjëse për fushën e financave dhe institucionit që financon programin.
Kur programi financohet nga buxheti i shtetit, njësitë e vetëqeverisjes vendore, brenda kuotave të përcaktuara paraprakisht nga ministria (numrit të familjeve që përfitojnë), miratojnë listën e familjeve sipas sistemit të pikëzimit të miratuar prej tyre dhe që plotësojnë kushtet e mëposhtme:
- kanë të ardhura mujore jo më të larta se të ardhurat mesatare të njësisë së vetëqeverisjes vendore përkatëse dhe nuk përballojnë dot pagesat e kredisë për blerjen e një banese me vlerë jo më të madhe se mesatarja e vlerave të tregut në atë njësi të vetëqeverisjes vendore dhe me sipërfaqe jo më të madhe se normat e strehimit dhe nuk disponojnë banesë në pronësi, ose disponojnë sipërfaqe banimi nën normat e strehimit, ose janë zhvendosur nga banesat.
Subvencionimi
Për çdo individ/familje, institucioni financiar llogarit shumën e subvencionimit të kredisë për të gjithë jetëgjatësinë e kontratës, e cila i njoftohet ministrisë përgjegjëse për strehimin. Kjo shumë nuk mund të jetë më e madhe se 100% e vlerës së banesës së blerë. Diferenca që rezulton midis vlerës së banesës dhe shumës që krediton institucioni financiar, paguhet në mënyrë të menjëhershme nga familja.
Masa e ndihmës për familjet që përfitojnë kredi të lehtësuara nga shteti planifikohet në buxhetin vjetor dhe afatmesëm të institucionit që financon programin, bazuar në informacionin që dërgon institucioni financiar mbi, ndër të tjera, numrin e përfituesve dhe sasinë e subvencionimit të shpenzuar dhe atë të nevojshëm për vitin pasardhës.
Familja, që ka përfituar banesë me kosto të ulët, nuk mund t’i kalojë të drejtat që ajo ka mbi këtë banesë te një individ tjetër ose ta lëshojë atë me qira gjatë periudhës së shlyerjes së kredisë.
