Raportuesi i Parlamentit Evropian për Serbinë, Vladimir Bilçik, dhe pjesëtari i delegacionit të Komitetit për Stabilizim dhe Asociim me Bashkimin Evropian, Matjaz Nemec ka kryer një vizitë dyditore në Beograd nisur nga tensionet e ditëve të fundit në veri të Kosovës.
Duke iu referuar këtyre ngjarjeve raportuesi i PE-së, Bilçik ka bërë thirrje që të ulen tensionet në veri të Kosovës dhe serbët të kthehen në institucione.
“Të gjithë jemi të shqetësuar në Bashkimin Evropian. Josep Borell dhe vendet anëtare lëshuan një deklaratë të qartë. Mesazhi bazë është de-përshkallëzimi, nuk mund të kemi dhunë, nuk mund të kemi sulme ndaj KFOR-it. NATO dhe EULEX janë në Kosovë për të ndihmuar të gjithë.
Nëse situata përkeqësohet, përgjegjësia është e të dyja palëve. Të krijohet hapësira për dialog, për organizimin e zgjedhjeve të reja. Shpresoj që serbët të kthehen në institucione”, deklaroi Bilçik.
Nga ana e tij, Nemec ka theksuar se të dyja palët duhet të angazhohen për të dalë nga kriza dhe të rihyjnë në rrugën e dialogut, shkruan raporton nova.rs.
“Jemi duke u përballur me një situatë të re, mendimi im është se duhet të kemi zgjedhje të reja në veri të Kosovës. Votuesit duhet të dalin dhe të votojnë. Të dyja palët duhet të angazhohen. Ne kemi një marrëveshje që ecën përpara, këto janë çështje të rëndësishme për të gjithë rajonin”, pohoi Nemec.
