Zyrtarët e lartë të administratës Trump pritet të takohen me zyrtarë të lartë rusë për të nisur bisedimet që synojnë përfundimin e luftës në Ukrainë.
Këshilltari për Sigurinë Kombëtare, Mike Waltz, Sekretari i Shtetit, Marco Rubio, dhe i dërguari për Lindjen e Mesme, Steve Witkoff, pritet të udhëtojnë drejt Arabisë Saudite për takimin me zyrtarë të lartë rusë, thanë për CNN dy burime. Një nga burimet tha se takimi do të zhvillohet në ditët në vijim.
Burimet nuk pranuan të specifikonin cilët zyrtarë rusë do të marrin pjesë, por CNN më herët ka raportuar se Kremlini po përgatit një ekip negociator të nivelit të lartë, që përfshin figura kryesore politike, të inteligjencës dhe ekonomike, si dhe Kirill Dmitriev, një zyrtar rus që luajti një rol të rëndësishëm në prapaskenë për lirimin e një të burgosuri amerikan së fundmi.
Presidenti Donald Trump deklaroi më herët këtë javë se negociatat për t’i dhënë fund luftës gati trevjeçare në Ukrainë do të fillojnë “menjëherë”, pas një telefonate “të gjatë dhe shumë produktive” me presidentin rus Vladimir Putin. Kjo ishte biseda e parë mes dy presidentëve që nga marrja e detyrës nga Trump muajin e kaluar. Trump u ka bërë të qartë këshilltarëve të tij se dëshiron t’i japë fund konfliktit në Ukrainë sa më shpejt të jetë e mundur.
Kryetari i Komisionit për Punët e Jashtme të Dhomës së Përfaqësuesve, Mike McCaul, konfirmoi planet gjatë një interviste për Politico në Konferencën e Sigurisë në Mynih të shtunën, duke thënë: “Rubio, Waltz dhe Witkoff po dërgohen në Arabinë Saudite për të biseduar me ukrainasit dhe rusët për Ukrainën.”
Departamenti i Shtetit kishte njoftuar më herët se Rubio do të vizitonte Arabinë Saudite në ditët në vijim si pjesë e një turi më të gjerë në Mynih dhe Lindjen e Mesme. Rubio, i cili mbërriti në Izrael të shtunën, zhvilloi një telefonatë me ministrin e Jashtëm rus, Sergey Lavrov, më herët gjatë ditës, sipas një deklarate të Departamentit të Shtetit.
“Sekretari rikonfirmoi angazhimin e presidentit Trump për të gjetur një zgjidhje për konfliktin në Ukrainë,” tha zëdhënësja e Departamentit të Shtetit, Tammy Bruce. “Përveç kësaj, ata diskutuan mundësinë e bashkëpunimit në disa çështje të tjera bilaterale.”
Ministria e Jashtme ruse e përshkroi bisedën Lavrov-Rubio si një “angazhim të ndërsjellë për të bashkëpunuar mbi çështjet aktuale ndërkombëtare, përfshirë zgjidhjen e situatës në Ukrainë” si dhe krizën në Lindjen e Mesme. Dy palët ranë dakord të mbajnë kontakte të rregullta, përfshirë përgatitjet për një takim të nivelit të lartë mes SHBA-së dhe Rusisë.
Ndërkohë, i dërguari i administratës Trump për Rusinë dhe Ukrainën, Keith Kellogg, tha të shtunën se vendet evropiane nuk do të jenë pjesë e tryezës së negociatave për zgjidhjen e luftës në Ukrainë.
“Përgjigja është jo,” tha Kellogg në një aktivitet në margjinat e Konferencës së Sigurisë në Mynih.
Ukrainasit do të jenë të pranishëm “natyrisht,” tha ai. “Do të ishte e pakuptimtë të thuhej se (Ukraina) nuk do të ishte.”
Sa i përket evropianëve, Kellogg tha se ai vjen nga një “shkollë e realizmit” dhe se duke parë marrëveshjen Minsk II të mëparshme, “kishte shumë njerëz në tryezë që realisht nuk kishin aftësinë për të zbatuar një proces paqeje, dhe ajo dështoi në mënyrë të mjerueshme.”
Marrëveshja Minsk II u negociua në kryeqytetin bjellorus në 2015 për t’i dhënë fund një konflikti dhjetëmujor në Ukrainën lindore. Përpjekja e rrallë diplomatike mblodhi së bashku liderët e Rusisë, Ukrainës, Gjermanisë dhe Francës, me synimin për të rivendosur paqen në rajonet e pushtuara nga separatistët pro-rusë në 2014. Megjithatë, marrëveshja hasi sfida në zbatim dhe përfundimisht nuk arriti të sillte stabilitet të qëndrueshëm.
Kellogg e përshkroi përpjekjen aktuale për një marrëveshje paqeje si një “proces me dy pista.”
“Keni një kanal rus që po zhvillohet. Në të njëjtën kohë, kemi një kanal ukrainas,” tha ai. “Pra, nëse shikoni lajmet, do të shihni që (i dërguari i Trump për Lindjen e Mesme) Steve Witkoff është i përfshirë sepse ai po ndjek linjën ruse. Ndërsa unë po punoj në linjën amerikano-ukrainase dhe atë të aleatëve. Po e bëjmë këtë për të përshpejtuar procesin.”
Trump ka lënë të kuptohet më herët këtë javë se mund të takohet me Putinin në Arabinë Saudite në një “të ardhme jo shumë të largët,” por theksoi se ende nuk është marrë një vendim zyrtar.
“Ne mendojmë se ndoshta do të takohemi në Arabinë Saudite, për herë të parë,” tha Trump për një takim të mundshëm me Putinin, disa orë pasi të dy kishin folur me telefon të mërkurën.
Presidenti theksoi se Princi i Kurorës i Arabisë Saudite, Mohammed bin Salman, do të luajë një rol në diskutime. Witkoff gjithashtu deklaroi se princi saudit ishte “vendimtar” në lirimin e amerikanit Marc Fogel, i cili ishte mbajtur në mënyrë të padrejtë në Rusi.
