Në Shqipëri në 24 orët e fundit edhe 15 qytetarë u infektuan me COVID 19, me çka numri i përgjithshëm i të infektuarve shkoi në 212. Me rastet e reja harta e të prekurve është shtrirë tashmë edhe në Mirditë dhe është zgjeruar në Tiranë, Fier dhe Durrës. Nga ana tjetër, numri i të shëruarve shkoi në 40, meqë së fundmi rezultuan negativ 7 të infektuar.
“Numri i atyre që kanë rezultuar pozitiv për COVID 19 tashmë ka arritur shifrën 212 raste. Nga kjo sëmundje deri tani kanë humbur jetën 10 qytetarë. Në shërbimin infektiv aktualisht ndodhen 76 persona të shtruar, prej tyre 6 janë në terapi intensive dhe 4 tashmë janë të intubuar. Pjesa tjetër e të shtruarve në pavijon është në gjendje të stabilizuar. Kemi 7 të shëruar në 24 orët e fundit, gjë që e çon numrin e të shëruarve nga COVID 19 në Shqipëri në 40”, tha Mira Rakacolli, Zv/ministre e Shëndetësisë.
Ndërkaq 7 mjekë dhe infermierë nga Urgjenca e Pukës dolën negativ pas testit për COVID 19, të cilët qëndruan në karantinë që nga 26 marsi për shkak të dyshimit se kishin qenë në kontakt me një të infektuar. Ora policore në Shqipëri dje filloi në ora 13:00 dhe zgjat deri në orën 5:00 të mëngjesit të së hënës.
