Ish-deputetja e Partisë Demokratike, Jorida Tabaku vizitoi bizneset në bulevardin “Petro Nini Luarasi”, pranë shkollës së Baletit në Tiranë.
Tabaku u njoh nga afër me shqetësimet e shitësve në këtë zonë të cilët vunë në dukje problemet me taksat, mungesën e konsumit dhe gjithashtu situatën problematike që po kalojnë familjet e tyre si pasojë e rënies së të ardhurave dhe krizës.
“Edi Rama dhe Erion Veliaj janë dështimi më i madh i 30 viteve të demokracisë. Kanë rritur taksat, kanë shkatërruar ekonominë, kanë larguar shqiptarët nga vendi. E kanë bërë Shqipërinë pronë të 5 vetave. Ne duam që në qendër të ekonomisë sonë të jetë biznesi familjar, të jenë njerëzit e ndershëm që punojnë, për këtë arsye kemi angazhime që ndihmojnë konsumin dhe ju ndihmojnë juve të ngriheni në këmbë”, u shpreh Tabaku.
Tabaku sqaroi se plani i PD ka në qendër biznesin familjar, biznesin e vogël dhe biznesin e ndershëm. Sipas saj problemi sot është mungesa e mbështetjes për punën e ndershme, sepse qeveria mendon për 5 biznese dhe familjet e tyre.
