Një grua shtatzënë nga Afganistani, e cila pësoi lëndime të rënda pasi ia vuri vetes flakën në një kamp refugjatësh në ishullin grek, Lesbos, është detyruar të japë deklaratë para një prokurori në spital. Autoritetet greke po e shqyrtojnë mundësinë që gruan ta akuzojnë për zjarrvënie.
Gruaja 26-vjeçare, emri i të cilës nuk është publikuar, e ka fituar të drejtën e azilit nga autoritetet greke dhe pritej që të udhëtonte drejt Gjermanisë me refugjatët e tjerë javën e kaluar. Megjithatë, zyrtarët dhe mjekët e kanë këshilluar që të mos udhëtojë, sepse është në fazën përfundimtare të shtatzënisë.
“Kur iu tha se nuk mund të udhëtojë, zhgënjimi e bëri që të tentonte për vetëvrasje. Ajo është penduar shumë për veprimin. Ka pësuar djegie në duar, këmbë dhe kokë. Është plot pendim. Ajo pritet ta lindë fëmijën e katërt javën e ardhshme”, tha hetuesi Nikos Triantafyllos.
Megjithatë, refugjatja tani përballet me akuzat për zjarrvënie, pasi tenda ku ajo e bëri përpjekjen për vetëvrasje u shkatërrua nga zjarri. Prokurori që do të vendosë nëse gruaja do të dalë para gjyqit e vizitoi atë në spital për t’ia marrë deklaratën, shkruan The Guardian.
Gruaja ia vuri flakën vetes të dielën e kaluar. Para se ta bënte këtë veprim, ajo i nxori dy vajzat dhe të birin jashtë tendës.
I vendosur në një ish-poligon ushtarak, kampi i përkohshëm po shërben për strehimin e rreth 6.500 burrave, grave dhe fëmijëve, shumica e të cilëve janë nga Afganistani. Banorët e kampit po përballen me kushte të rënda, ndërsa aktivistët për të drejtat e njeriut kanë thënë se kampi nuk i plotëson kushtet themelore për banim.
