ederata e Futbollit të Spanjës ka njoftuar se përzgjedhësi Luis Enrique më 15 mars do të shpall listën për ndeshjet e ardhshme. Por në njoftim Federata e Futbollit e Spanjës nuk ka pasur trajtim të barabartë për Kosovën ashtu si për përfaqësueset tjera.
Kosovës, Federata e Futbollit e Spanjës i është referuar si “territori i Kosovës”.
“Spanja nis rrugën për në Katari 2022 ndaj Greqisë, Gjeorgjisë dhe territorit të Kosovës”, thuhet në njoftimin e Federatës së Futbollit të Spanjës.
Kosova është e pranuar me të drejta të plota në UEFA e FIFA me emrin zyrtar të saj. Por Spanja nuk e njeh shtetin e Kosovës dhe tani as ndaj përfaqësueses nuk ka pasur qasje si ndaj përfaqësueseve tjera.
Kosova luan ndaj Spanjës më 31 mars në Seville. Kosova fillimisht luan miqësore me Lituaninë më 24 mars e më pas hap eliminatoret për Botërorin 2022 ndaj Suedisë, më 28 mars në Prishtinë.
Ndërkohë Spanja ndeshjen e parë kualifikuese e luan ndaj Greqisë më 25 mars. Më 28 mars është ndeshja Gjeorgji – Spanjë, ndërsa më pas spanjollët e presin Kosovën.
Spanja është favorite për të fituar grupin. Ajo vlerësohet prej përfaqësueseve më të mëdha në botë. Ndeshjen e fundit e ka fituar ndaj Gjermanisë, 6:0, më 17 nëntor të vitit të kaluar.
Ndeshja Spanjë – Kosovë nuk pritet të jetë si gjithë të tjerat pikërisht për faktin se Spanja nuk e njeh shtetin e Kosovës. Fillimisht ka pasur zëra që ndeshja të luhet në territor neutral. Por autoritetet spanjolle u pajtuan që ndeshja të luhet në Spanjë, me gjithë faktin se nuk e njohin shtetin e Kosovës. Në të kaluarën sportistët kosovarë kanë pasur telashe për përfaqësim të barabartë në ngjarjet e mbajtura në territorin e Spanjës. Por ka pasur edhe raste kur sportistët kosovarë janë trajtuar të barabartë me sportistët e vendeve tjera. Në Botërorin e juniorëve në hendboll, dy vjet më parë, ishte intonuar himni i Kosovës dhe ishte shfaqur flamuri i Kosovës.
Në futboll çështja është më problematike për shkak të publicitetit. Më parë spanjollët kishin refuzuar të ofrojnë trajtim të barabartë për një përfaqësuese të grupmoshave të reja të Kosovës dhe i gjithë turneu kualifikues ishte zhvendosur në Zvicër.
“Spanja do të mbyllë ndeshjen e këtij muaji më 31 mars në stadiumin La Cartuja në Seville përballë territorit të Kosovës”, shkruan ndër të tjera në njoftimin e Federatës së Futbollit të Spanjës.
Kosova i ka në grup edhe dy përfaqësuese të shteteve që nuk njohin shtetin e Kosovës, Greqinë e Gjeorgjinë. Por ndaj Greqisë e Gjeorgjisë nuk pritet të ketë telashe të prezantimit të barabartë.
