Betim Halimit iu realizua një ëndërr të martën. Ai edhe zyrtarisht ka pranuar ftesën për herë të parë nga përfaqësuesja e Kosovës në futboll. U ftua për ndeshje kualifikuese, kundër Suedisë dhe Spanjës. Janë edhe dy ndeshjet më të forta për Kosovën në ciklin e dytë të saj kualifikues për kampionatin botëror, atë “Katari 2022”. Të parën kundër Suedisë, “Dardanët” e luajnë në Prishtinë më 28 mars, kurse pas tri ditësh në udhëtim luajnë ndaj gjigantes evropiane, Spanjës. Para këtyre dy ndeshjeve, Kosova më 24 mars në stadiumin “Fadil Vokrri” e luan miqësoren kundër Lituanisë.
Portieri Halimi e ndien veten gati për ta dhënë kontributin e tij te Kosova. Madje, ka plane edhe më të mëdha.
“Besoj shumë që një ditë do të jem titullar”, ka thënë Halimi të martën për KOHËN.
Halimi thotë se është nder për të ta përfaqësojë vendlindjen.
“Gjithmonë kam pasur ëndërr që një ditë të arrij të luaj për përfaqësuesen A të Kosovës. Është nder dhe privilegj për mua që më në fund erdhi kjo ditë. Shpresoj që të vij me këmbë të mbarë dhe do ta jap më të mirën për vendin tim. Kam besuar që një ditë do ta kem këtë mundësi, pasi kam punuar goxha shumë për të arritur deri në këtë nivel. Është njëra nga arritjet më të mëdha për mua në karrierë. Shpresoj ta kem shëndetin dhe të eci edhe më lart”, ka theksuar Halimi, që së fundi ka zënë vendin e titullarit te skuadra elitare e Ukrainës.
Portieri i gjatë 204 centimetra këtë edicion për Olimpik Donetskun ka luajtur gjashtë ndeshje në të gjitha garat.
“Fizikisht jam shumë mirë. E kemi nisur fazën përgatitore më 11 janar dhe besoj që jam në formën më të mirë të mundshme. Gjithë potencialin tim do ta tregoj gjatë grumbullimit me Kosovën”, ka thënë Halimi.
Në fakt Halimi pati marrë ftesë nga Kosova në janar të vitit të kaluar për miqësoren që përfaqësuesja B e luajti ndaj Suedisë B, ndeshje të cilën e fitoi kjo e fundit në Doha të Katarit me rezultatin 1:0. Por lëndimi ia mohoi atij grumbullimin e mbase edhe debutimin me “Dardanët”.
Halimi është formuar si portier te Vllaznia e Pozheranit. Ai është nga Pozherani, ndërsa në Kosovë ka luajtur edhe për Hajvalinë dhe Dritën e Gjilanit. Te Drita
ishte në dy periudha. Te Drita ishte portier i parë. Para se t’i bashkohej Olimpik Donetskut, Halimi ka luajtur edhe për klubin e Estonisë, Narva, ndërsa në të kaluarën ka qenë pjesë e U-19 dhe U-21 të Kosovës. Me U-21 nuk ka pasur ndonjë paraqitje në ndeshje kualifikuese, ka qëndruar në stol.
Olimpik Donetskut iu bashkua në shkurt të vitit 2019, kurse ka kontratë deri në qershor të vitit 2022.
Halimi thotë se ka plane që të bëj ndonjë lëvizje më të madhe gjatë verës.
“Edhe në klub janë ndarë të lumtur për ftesën që mora. Më kanë uruar sukses. Do të ma rrisë vlerën edhe më shumë dhe besoj që në verë do të kemi ndonjë lëvizje. Shpresoj ta mbyll mirë këtë sezon pa ndonjë lëndim dhe me paraqitje të mira. Verës besoj se do të ketë lëvizje. Ka lëvizje në atë drejtim, por do të shohim deri në verë nëse do të arrijmë marrëveshje. Nuk mund të them ende asgjë për shtetin apo klubin, sepse është ende herët”, ka thënë Halimi.
