Sot u nënshkrua kontrata për Aeroportin e Vlorës, që do të ndërtohet nga konsorciumi pjesë e të cilit është edhe politikani Behgjet Pacolli.
Biznesmeni Pacolli dhe kompania e tij, Mabetex Group do të ndërtojnë aeroportin e Vlorës në bashkëpunim me kompaninë Yda Group.
Ky bashkim i dy kompanive të regjistruara në Zvicër janë shpallur më 5 mars fituese nga kompania shqiptare dhe do të investojnë një vlerë prej 104 milionë euro për ndërtimin e këtij aeroporti.
“Vlora është një rast jashtëzakonisht i mirë, për mua dhe partnerët e mi. Do të jemi krenar me këtë vepër që do bëjmë, në vendin ku më rëndon koka, që këtë e bëj për popullin tim dhe me njerëzit që kanë kontribuar për një Shqipëri evropiane. Ne do ia dalim, dhe nuk mbete asgjë tjetër veçse të nisim punën”, tha Pacolli.
Aeroporti Ndërkombëtar i Vlorës do të operojë edhe për aeroplanët e mallrave duke kryer funksionin e kargos. Gara për ndërtimin e tij u hap fillimisht në muajin dhjetor të 2019-së, por u shty për shkak të situatës që krijoi në fushën e aviacionit pandemia e COVID-19.
Qeveria e Shqipërisë e rihapi konkursin në fund të muajit nëntor 2020, e nëse kontrata finalizohet, ndërtimi i tij përfundon pas dy viteve.
