Aeroporti i Stambollit, më i riu i Turqisë, mund të bëhet qendra më e ngarkuar e Evropës duke lënë pas Aeroportin “Heathrow” të Londrës kur sektori i aviacionit të dalë nga kriza COVID-19.
Ralph Anker, analist i aviacionit, deklaroi të martën vonë për uebfaqen e së përditshmes britanike, “The Independent”, se “aeroportet në Evropën Perëndimore kanë humbur një përqindje shumë më të lartë të udhëtarëve sesa rivalët e tyre në Lindje, sidomos në Rusi, Turqi dhe Ukrainë”.
Duke nënvizuar se aeroportet e Evropës Perëndimore do të mbeten pas Aeroportit të Stambollit në numrin e pasagjerëve, Anker tha se mega-aeroporti i ri i metropolit më të madh të Turqisë do të bëhet qendra më e ngarkuar në Evropë.
“Derisa aeroportet si «Heathrow», të cilat mbështeten kryesisht në trafikun ndërkombëtar, të rikuperohen përfundimisht, ka shumë të ngjarë që mega-aeroporti e ri dhe i pakufishëm i Stambollit të jetë pozicionuar si aeroporti më i ngarkuar i Evropës”, theksoi ai.
Artikulli i titulluar “Analisti i aviacionit thotë se «Heathrow» do të humbasë kurorën e Evropës përballë Aeroportit të Stambollit” – shkruar nga Simon Calder, korrespondent për udhëtimet i “The Independent” – tërheq vëmendjen se Aeroporti i Stambollit “pritet të jetë i aftë të përpunojë 200 milionë pasagjerë në vit brenda disa viteve”.
Gjithashtu në artikull u vu në pah se Aeroporti i Stambollit pati një performancë rreth 5 herë më të lartë sesa Aeroporti “Heathrow” i Londrës duke pritur në mars 2021 gati 40% të pasagjerëve të tij në vitin 2019.
Organizata Evropiane për Sigurinë e Lundrimit Ajror (EUROCONTROL) bëri me dije fundjavën e kaluar se Aeroporti i Stambollit vazhdon të mbajë kreun në tabelat evropiane të trafikut me 604 fluturime në 14 prill.
Sipas raportit të fundit të trafikut ajror, Aeroporti i Stambollit u pasua nga “Charles de Gaulle” i Parisit me 478 fluturime, nga aeroporti i Frankfurtit me 474 dhe i Amsterdamit me 451 ditore.
I pesti u rendit Aeroporti “Barajas” i Madridit me 414 fluturime në ditë, ndjekur nga Aeroporti “Sabiha Gokcen”, gjithashtu në Stamboll, me 345 fluturime.
“Shtatë nga 10 aeroportet më të mira në Evropë regjistruan një rënie të trafikut gjatë dy javëve të fundit, përsëri në nivelin e pauzave para pashkëve”, shtoi EUROCONTROL-i.
Vitin e kaluar, Aeroporti i Stambollit fitoi njohje të lartë globale duke u quajtur “një aeroport me 5 yje” nga “Skytrax”, agjenci e vlerësimit të transportit ajror me seli në Londër.
