Kryedemokrati Lulzim Basha pret në selinë e PD-së kandidatët për deputetë. Të gjithë kanë hyrë në seli një nga një por asnjë nuk ka bërë me dije detaje nga takimi i zhvilluar.
Heshtje në selinë blu! Kur kanë mbetur dhe kutitë e fundit pa numëruar, kryedemokrati Lulzim Basha është mbyllur në zyrën e tij në selinë e Partisë Demokratike. Fillimisht në zyrën e Bashës ka shkuar koordinatori i Posaçëm Politik, Eduart Halimi.
Ky i fundit ka biseduar me Bashën për rreth 60 minta dhe më pas është larguar, ndërsa pas tij në seli ka shkuar edhe kreu i Partisë për Drejtësi, Integrim dhe Unitet, Shpëtim Idrizi, i cili për 30 minuta ka diskutuar me Bashën. Më pas, me Bashën është takuar edhe numri dy i Partisë Demokratike, Gazment Bardhi.
Në fund, në selinë kanë mbërritur edhe kandidatët Alfred Rushaj dhe Jorida Tabaku, por asnjë prej tyre nuk ka bërë me dije detaje nga takimet që kanë zhvilluar me kreun e partisë së tyre.
Mbetet për t’u parë se cila do të jetë lëvizja e radhës e numrit një të PD-së, i cili këto zgjedhje ka arritur që të grumbullojë 59 mandate.
Zgjedhjet parlamentare të 25 prillit kanë nxjerrë fitimtarë Partinë Socialiste me përafërsisht 74 mandate. Ndërkohë që numërimi i votave po shkon drejt fundit, pasi kanë kaluar rreth 90% ende nuk ka asnjë sinjal nga selia blu. Burime për “Abc” bëjnë me dije se kryedemokrati Lulzim Basha po ndjek minutat e fundit të procesit të numërimit nga zyra e tij në seli ku edhe ka mbërritur që prej orës 09:00 të mëngjesit të sotëm. Mësohet se bashkë me të në zyrën e tij ka qenë edhe koordinatori i Posaçëm Politik Eduart Halimi, i cili ka biseduar me Bashën për rreth 60 minta dhe më pas është larguar. Megjithatë ende nuk dihet nëse kryedemokrati do të dalë sot për të pranuar humbjen.
