“Siguria e kolegëve dhe konsumatorëve tanë është prioriteti ynë i parë dhe vazhdojmë të ndjekim prej afër gjendjen në rajon”, thuhet në njoftimin e kompanisë
Kompania britanike ajrore British Airways, për shkak të tensioneve mes Izraelit dhe Palestinës që po vazhdojnë, ka anuluar fluturimet Londër-Tel Aviv dhe ato të kthimit, transmeton Anadolu Agency (AA).
“Ashtu si kompanitë tjera ajrore, sot kemi anuluar fluturimet për dhe nga Tel Aviv-i. Siguria e kolegëve dhe konsumatorëve tanë është prioriteti ynë i parë dhe vazhdojmë të ndjekim prej afër gjendjen në rajon”, thuhet në njoftimin e kompanisë.
Ndërkohë, numri i të vdekurve nga sulmet izraelite në Rripin e Gazë të rrethuar ka arritur në 83, pasi 11 palestinezë të tjerë humbën jetën në sulmet izraelite.
Grupet e rezistencës palestineze i dhanë policisë izraelite një afat për t’u tërhequr nga lagjja Sheikh Jarrah dhe kompleksi Al-Aksa në Kudsin Lindor të okupuar deri në orën 18:00 më 10 maj. Forcat izraelite nuk u tërhoqën brenda afatit të caktuar, i cili u pasua nga konflikti dhe sulme të ashpra nga forcat izraelite në Gaza.
