Mërgim Berisha ka siguruar kalimin në finale të Kampionatit Evropian për grupmoshën U21 në futbollin me Gjermaninë.
Berisha pati paraqitje mbresëlënëse, duke e qëlluar tri herë shtyllën, por pa arritur të shënonte gol.
Sulmuesi i Salzburgut, 23-vjeçari Berisha, të enjten në mbrëmje me Gjermaninë mposhti Holandën në gjysmëfinale me rezultatin 2:1.
Florian Wirtz i realizoi të dyja golat për skuadrën gjermane.
Të parin e realizoi pas vetëm 29 sekondave pasi u asistua nga Lukas Nmecha dhe hyri në histori të garës. Ai u bë golashënuesi më i shpejtë në një Kampionat Evropian për të rinj. Rekordi paraprak ishte goli i shënuar pas 41 sekondave nga David Rozenhal i Republikës së Çekisë ndaj Italisë në vitin 2002, po ashtu në një gjysmëfinale.
Ndërkohë, golin e dytë, Wirtz e shënoi në minutën e tetë. Sulmuesi i Leverkusenit kësaj radhe u asistua nga Ridle Baku.
Në pjesën e dytë, holandezët ngushtuan epërsinë me mbrojtësin e Ajaxit, Perr Schuurs, por kjo ishte e tëra.
Berisha shtyllat i qëlloi në minutën e 20-të, dhe dy tjerat brenda një aksioni në minutën e 60-të.
Ai u zëvendësua nga Ismail Jakobs në minutën e 84-rt.
Gjysmëfinalja u zhvillua në stadiumin MOL Arena Sosto në Hungari, para 14 mijë e 144 tifozëve të pranishëm.
Finalja Portugali – Gjermani luhet të dielën në Lubjanë.
