Presidenti, Ilir Meta, kreu të gjitha ritet fetare dhe ndezi qirinj në Shijon me rastin e festës së Shën Joan Vladimirit.
Por, siç tha ai, kjo nuk ishte një lutje për ta shpëtuar nga shkarkimi i pashmangshëm në 9 qershor në Kuvend por një lutje për të falur të gjithë ata që nuk dinë çfarë bëjnë.
“Nuk ekziston asnjë lutje e tillë, lutja është Zoti ti falë të gjithë ata që nuk dinë se çfarë bëjnë dhe ti udhëheqë të gjithë në rrugën e të mirës së përbashkët. Kam ardhur këtu për t’iu bashkuar këtij mesazhi bashkëjetese”, tha Meta.
E ndërsa mazhoranca duket se i ka votat për shkarkimin, Meta nuk preferoi ti japë një përgjigje direkte pyetjes nëse do të jetë apo jo President deri në 2022.
“Nuk dëshiroj të flas në një vend të shenjtë për çështje që nuk ekzistojnë. Kuvendi sot është dhe tre herë më antikushtetues se ka qenë, asnjë shqetësim. Nëse doni të merreni me një gjë serioze merruni me hetimin e krimeve zgjedhore para, gjatë dhe pas 25 prillit”, tha Meta.
Fati i Ilir Metës, President, do të vendoset në 9 qershor në orën 10:00. Pas hartimit të raportit nga komisioni hetimor, konferenca e kryetarëve i la disa ditë kohë deputetëve për tu njohur me dokumentin voluminoz.
Taulant Balla tha se iniciativa për shkarkimin e Metës ka ardhur si nevojë për të çliruar institucionin e Presidentit nga një pengmarrje politike.
