Kryeministri Edi Rama i është drejtuar qytetarëve shqiptarë me një mesazh në lidhje me rritjen e çmimit të karburanteve, që sipas tij po vjen si pasojë e një krizë të jashtëzakonshme energjetike.
Rama tha se një fatkeqësi e re natyrore e kombinuar me faktorë gjeopolitikë e manovra tregtare, është një tjetër sfidë e rëndë për vendin.
“Vala goditëse e një tjetër fatkeqësie natyrore kësaj radhe e kombinuar me faktorë gjeopolitikë dhe manovra tregtare po vjen drejt Shqipërisë. Nuk është as tërmet, as virus, as përmbytje dhe lavdi Zotit nuk kërcënon jetë njerëzish. Pro në aspektin ekonomik dhe social ka një energji negative. Kjo është kriza e jashtëzakonshme energjitike e cila vetëm sapo ka nisur të japë shenjat e saj shqetësuese në botë duke nisur nga Kina dhe Koreja e Jugut deri në Amerikë e Britaninë e Madhe dhe BE e deri në fendet fqinje si Italia e Greqia. Temperatura e kësaj krize po rritet kudo, tani më me orë jo me ditë”, tha Rama.
Kryeministri e cilësoi këtë krizë një sporvë aq të fortë sa tërmeti dhe pandemia. Rama vijoi duke thënë se trendi i fortë i rritjes së çmimit të karburanteve sot qëndron para vendeve të gjithë botës.
“Tamam kur shpresat për rikthimin në normalitet, pas tragjedisë së shkaktuar nga pandemia, të cilës njerëzimi po i paguan koston e humbjeve njerëzore të një lufte botërore, janë rritur ndjeshëm, falë vaksinimit masiv dhe ritmeve të larta të rimëkëmbjes ekonomike, kjo krizë e re, na vendos me detyrim përcaktim përpara një sprove të re, po aq të fortë sa tërmeti e sa pandemia, në aspektin ekonomik e social. Dukuria e rritjes marramendëse të çmimit të gazit e të karbonit në të gjitha tregjet ndërkombëtare, si edhe trendi i fortë i rritjes së çmimit të naftës, shoqëruar me një rritje të përgjithshme çmimesh të prodhimeve të konsumit të përditshëm, qëndrojnë sot para të gjitha vendeve, si siluetat e një ushtrie armike në horizontin e dimrit të vështirë që bota ka përpara”, tha Rama./OraNews/
