Numri i shteteve në listën e kuqe të Britanisë së Madhe është shkurtuar në shtatë, nga 54 sa ishin deri më tani, ka bërë të ditur qeveria britanike të enjten.
Afrika Jugore, Brazili dhe Meksika janë në mesin e shteteve që janë hequr nga lista e kuqe. Kjo listë kërkon nga udhëtarët që vijnë nga shtetet që e përbëjnë, që të karantinohen në ndonjë hotel, për plotë 10 ditë me shpenzime të tyre, me të arritur në Britani.
Sekretari i Transportit, Grant Shapps ka deklaruar se ndryshimet nisin së zbatuari nga e hëna e ardhshme, dhe shënojnë “një hap tjetër” në rihapjen e udhëtimeve.
Kjo lëvizje po shihet si një ndihmë e madhe për industrinë e fluturimeve dhe familjet që janë ndarë gjatë pandemisë.
Panama, Kolumbia, Venezuela, Peru, Ekuadori, Haiti dhe Republika Dominikane, vazhdojnë të mbesin në listë të kuqe.
Ndërkohë, udhëtarëve që vijnë nga 37 destinacione të tjera, do tu pranohen certifikatat e vaksinimit, që nënkupton se kësisoj ata mund të evitojnë shpenzimet e tjera, siç janë ato të testimeve.
Udhëtarët e vaksinuar që arrijnë nga Brazili, Hong Kongu, India, Pakistani, Afrika Jugore dhe Turqia, do të trajtohen njëjtë si banorët e imunizuar të Britanisë së Madhe, nëse nuk kanë vizituar ndonjë prej vendeve të listës së kuqe, 10 ditë para se të arrinin në Angli.
