Protestuesit në Hong-Kong kanë hyrë në zonën e mbërritjeve në aeroport, ku udhëtarëve u kanë ndarë fletëpalosje dhe vendosin parulla në shumë gjuhë.
Kjo po ndodh drejtpërdrejt para protestave të planifikuara për fundjavën e ardhshme nëpër qytet, me qëllim që turistët t’i njohin me gjendjen në Hong-Kong dhe me kërkesat e tyre.
Disa nga porositë e fletëpalosjeve janë: “Ju lutemi na falni për Hong-Kongun e papritur” dhe “Keni ardhur në një qytet të prishur, të shkatërruar, e jo në atë që e keni imagjinuar. Ndërkaq, ne po luftojmë për këtë Hong Kong”.
Disa qindra, kryesisht të rinj të veshur me të zeza kanë ndarë fletëpalosje me vizatime të cilat i përshkruajnë protestat dymujore, të cilat kanë sjellë deri në krizën më të madhe në atë qytet pasi Britania e Madhe në vitin 1997 ia ktheu Kinës.
Udhëheqësia e aeroportit në Hong-Kong ka bërë të ditur sot se vetëm pasagjerëve të cilët mbërrijnë dhe të cilët kanë pasaporta do t’u lejohet të hyjnë në terminal, pasi protestuesit paralajmëruan protestë treditore që t’u tregojnë turistëve për gjendjen në qytet.
Autoritetet në Hong-Kong sot tentuan t’i bindin vizitorët se qyteti është i sigurt, pasi paraprakisht disa vende lëshuan paralajmërim për sigurinë lidhur me protestat.
Në Hong-Kong tashmë dy muaj po mbahen protesta masive, fillimisht kundër ligjit për ekstradim, ndërsa pastaj edhe kundër dhunës së policisë. Ditëve të fundit protestuesit kërkojnë të drejta më të mëdha demokratike.
